لو حد بنحبه اتعرض لأزمة صحية، وحالته استدعت وجوده في المستشفى علشان يتلقى الرعاية الصحية بشكل كامل، طبيعي بنكون حاسين إننا عايزين نقف جنبه ونبين له اهتمامنا بيه وقد إيه نفسنا يقوم بالسلامة ويرجع أحسن من الأول، حتى لو مش حد قريب لينا، بس أكيد زيارة المريض في العموم واجب مابيفوتناش وبنحب نكون واقفين جانب بعض خصوصًا لو في الأوقات الصعبة دي، وسط كل ده، ممكن نقول كلام يأثر بشكل وحش على المريض ويضايقه، بدل ما نحاول نخرجه من اللي هو فيه نفسيًا ونرفع من روحه المعنوية، لازم ناخد بالنا من الجُمل دي:
“أنت بتتدلع علشان تعرف غلاوتك”
جملة من زمان بنسمعها لما نكون تعبانين، يمكن اللي بيقولها قصده يهون علينا التعب ويقول إنها بسيطة، بس الجملة حقيقتها مستفزة وبتحسس المريض إن ماحدش مقدّر تعبه وبتحسسه إن اللي حوليه مستهونين بمرضه ووجعه.
“سمعت إن العملية دي صعبة”
لو المريض حالته تستدعى تدخل جراحي أو عملية، فبدل ما اللي حوليه يهونوا عليه ويقولوا له إنه هيطلع منها بالسلامة، يلاقي حد جاي يزوره يقوله أنا سمعت إن العملية اللي أنت هتعملها دي صعبة، أو نسبة نجاحها قليلة، دي بقى بصراحة مش لاقيين ليها أي مبرر يكون نية كويسة. جملة بكل المقاييس ماينفعش تتقال.
“ريحة المستشفيات دي وحشة”
المريض بيبقى من غير حاجة مش طايق المستشفى ونفسه يمشي منها في أسرع وقت وكاره القعدة فيها، ماينفعش كمان حد يروح يزوره يكرهه في حياته أكتر ويذكر إن ريحة المستشفى دي بيتشائم منها أو مش بيحبها.
“أكل المستشفيات ده مالوش طعم”
مش بعيدة عن اللي قبلها، علشان المريض فعلًا بيكون لوحده متضايق من المستشفى ومن إنه ممنوع عنه الأكل اللي بيحبه ومضطر ياكل أكلات معينة حسب مرضه، المفروض نحاول نحببه فيه ونخليه عنده نفس للأكل مش العكس.
“اوعى تلمس حاجة هنا”
لما حد ينصح شخص جاي معاه الزيارة للمريض، بإنه مايلمسش حاجة في المستشفى بس بشكل مش دايمًا بيكون مناسب لنصيحة، في معظم الأوقات بتتقال بطريقة تحسس المريض إنه وباء يتخاف منه أو إننا مش طايقين المكان.
“أنا مابروحش للدكتور إلا لو حالتي اتدهورت”
غير إن نظرية حضرتك دي غلط، ومش شيء يدعو للتفاخر، فهي كمان بتحسس المريض إن حالته الصحية متأخرة وبتقلل من الأمل في الشفاء.
“هقولك بقى على وصفة وسيبك من الدكاترة والمستشفيات”
على نفس طريقة “اسأل مجرب ولا تسألش طبيب” اللي بتودي في داهية دي، ومطلوب مننا على أساسها نلغي الطب كله ونمشي ورا وصفات مجهولة المصدر، ماينفعش تطلب من المريض مايلتزمش بنصائح الدكاترة وتقلل من عزيمته في رحلة الشفاء، وتوهمه إن حل مشاكله الصحية في وصفة من عند عطار!