الناجتس هي من أكتر الأكلات المفضلة عند تقريبًا الناس كلها، من صغيرين لكبار، فهي أكلة سريعة وبتشبع وطعمها حلو، وممكن تنفع لأي وجبة في اليوم، ولكننا دايمًا بنشتريها جاهزة من برا، يا بتكون معلبة وجاهزة للتحمير يا من مطاعم، واللي كتير بنصادف مواقف مش لطيفة مع الأكل اللي بنشتريه جاهز من برا، سواء في النضافة أو في محتويات الأكل اللي مابنكونش عارفين هي مصدرها إيه أصلًا، وبالذات في الناجتس اللي معروف عنها إنها بتكون كتاكيت مفرومة أو بواقي عظام الفراخ، وعلشان نتجنب ده كله، هنقولكم على وصفات سهلة ومختلفة للناجتس تقدروا تعملوها في البيت.
الناجتس الفراخ
هنحتاج نص كيلو صدور فراخ مفرومة، وبصلة مفرومة، ومعلقة نعناع كبيرة مفرومة، و3 فصوص توم، ومعلقتين عصير ليمون، و3 معالق بقدونس كبيرة مفروم، و2 بيضة مضروبين، وبقسماط مفروم، ومعلقتين مرقة فراخ بودرة صغيرة، وكوبايتين زيت، وملح وفلفل، بصل بودرة.
هنخلط الفراخ المفروم مع البصل البودرة، ونزود التوم والبصل البودرة، ونزود البقدونس والبيض والملح ومرقة الفراخ، ونتبلها بالفلفل والملح مع التقليب، ونحط المكونات كلها في الكبة ونخلطهم كويس، ونعمل الخليط على شكل حتت كور صغيرة ونحطها في دقيق وبعد كده بيض وبعد كده بقسماط، ونحمرها في زيت لغاية ما لونها يكون دهبي.
الناجتس باللحمة
هنحتاج ربع كيلو لحمة مفرومة، وبصلة، وبيضة، وملح وفلفل، ومعلقة بهارات صغيرة، وبقدونس متقطع، وبطاطساية مسلوقة، ومعلقة زيت، وبقسماط.
هنشوح اللحمة المفرومة ونزود التوابل والبصل ونقلب المكونات مع بعض، ونسيبهم لمدة 5 دقايق على نار هادية، ونقفل ونسيبها تبرد، وهنقشر البطاطساية وهنخلطها مع البيضة وملح وكمون وفلفل في الكبة، ونزودهم على اللحمة مع البقسماط والبقدونس، ونسيبها في التلاجة نص ساعة، وبعد كده نطلعها من التلاجة، وندهن ايدينا زيت ونكورها، بعد كده هنحطها في صينية على ورق زبدة ونشويها في الفرن، أو نغمسها في بيض وبقسماط ونقليها في الزيت.
الناجتس النباتي
هنحتاج جزر مبشور بروكلي وتوم مفروم وبقسماط وجبنة شيدر وبيض وبصل بودرة وملح وفلفل وزيت وبطاطس مسلوقة.
هنفرم الجزر مع البروكلي والتوم والملح والفلفل والجبنة، ونزود البصل البودرة والبيض وشوية بقسماط للتماسك، ونضيف البطاطس المسلوقة والمهروسة، ونكور الخليط حتت صغيرة ونشوحه في طاسة بزيت لغاية ما تتحمر.
الناجتس بالجبنة
هنحتاج نص كيلو صدور فراخ مفرومة، وكوبايتين جبنة موتزاريلا أو شيدر متقطعة مكعبات صغيرة، وكوباية بقسماط، وكوباية دقيق، و2 بيضة كبيرة، ونص معلقة صغيرة توم بودرة، ومعلقة صغيرة بهارات إيطالية (أوريجانو، وزعتر مجفف، وريحان مجفف)، وملح وفلفل أسود.
هنضرب البيض مع الملح والفلفل في طبق، وفي طبق تاني هنخلط البقسماط مع الدقيق مع الملح والفلفل والبهارات والتوم، وفي طبق تالت هنقلب الفراخ مع الملح والفلفل، وهنكور الفراخ حتت صغيرة ونحشيها مكعبات الجبنة، ونغمسها في الدقيق وبعد كده البيض وبعد كده البقسماط بعد كده البيض تاني، والبقسماط تاني، وهنقليها في الزيت لغاية ما لونها يكون دهبي.
الناجتس في الفرن
هنحتاج 500 جرام من صدور الفراخ المفرومة، ونص كوباية لبن زبادي، ونص كوباية كورن فليكس مطحون، وربع كوباية بقسماط، ومعلقة بودرة توم صغيرة، ونص معلقة ملح صغيرة، وربع معلقة أوريجانو صغيرة، ونص معلقة فلفل صغيرة، ومعلقة زيت زيتون كبيرة.
هنسخن الفرن على درجة حرارة 400، وهنكور الفراخ حتت صغيرة ونخلطها مع اللبن في طبق، ونغطيه ونسيبه في التلاجة لمدة نص ساعة، وعلى جنب هنخلط التوم بالكورن فليكس بالبقسماط مع الأوريجانو والفلفل في طبق، وبعد كده هنشيل الفراخ من اللبن ونغمسها في خليط الكورن فليكس، ونحط الفراخ في صينية على ورق زبدة، وندخله الفرن لمدة 10 دقايق، ونقلب لحد ما تتحمر.