في عيد ميلاد الفنانة ياسمين صبري الـ 33، تعالوا نشوف السوشيال ميديا تفاعلت إزاي..

إمبارح، الخميس 21 يناير، الفنانة الجميلة ياسمين صبري إحتفلت بعيد ميلادها الـ 33 بمجموعة من الصور شاركتها مع متابعيها على السوشيال ميديا للحفل المفاجئ اللي عملهولها زوجها رجل الأعمال المصري أحمد أبو هشيمة. في الصور والفيديوهات اللي نزلت، الفنانة كان باين عليها الفرحة الشديدة وإنبهارها بالمجهود اللي بذله جوزها في الإعداد للحفلة دي.

الحفلة كانت مليانة بلالين هيليوم عليها حروف اسم ياسمين بالإنجليزية وصورها، والتورتة كانت من أربع أدوار اتكتب على قمتها “Happy Birthday, Yasmine”.

واستقبل المصريين الخبر على السوشيال ميديا باهتمام زايد لدرجة إنهم خلوه تريندنج، وبقى الكل بيتكلم عنه. وبالرغم من إن البعض استغل فرحة الثنائي وحولها لحملة جديدة من التنمر عليهم، إلا إن معظم التعليقات كانت مليانه بالتهنية والفرحة.

كتير من نجوم الوسط الفني كمان هنوا ياسمين صبري على إنستجرام وتويتر بعيد ميلادها، وأكتر من حد أشاد بيها وبأعملها وتألقها اللي بيبهرنا أكتر وأكتر مع مرور الوقت.

في عيد ميلادها ظهرت الفنانة بإطلالة أنيقة نالت رضا كل متابعيها فيها؛ ياسمين صبري لبست فستان أحمر في قمة الشياكة من دار الأزياء العالمي Dolce and Gabbana بقيمة 1478 يورو، أما بالنسبة للمكياج فكانت ألوانه قوية ركزت فيها على رسمة العين، وتوجت الإطلالة بكوليه أحمر القصوص ر تناسق جدًا مع لون الفستان والروج.

ظهرت الفنانة ياسمين صبري أول مرة على الساحة السينمائية في مسلسل “خطوات الشيطان”، وشاركت بعدها في أعمال درامية ناجحة زيّ “جبل الحلال”، و”طريقي”، وفي الكام سنة الأخيرة دول عليّ نجمها لحد ما تصدرت بطولات محتلفة على السينما والتلفيزيون، آخرها كان مسلسل “فرصة تانية” رمضان اللي فات اللي شاركها في بطولته كوكبة من كبار الفنانين.

على السوشيال ميديا ياسمين ظهرت كداعمة للـ fitness وللاهتمام باليوجا والأكل الصحي، ودايمًا على إنستجرام الفنانة بتشاركنا بصور من تمريناتها اليومية اللي بتلهم كتير من المصريين والعرب، ولكن في الفترة الأخيرة وبسبب بعض من تصريحاتها بعض منها كان جدلي وبعض منها كان مقتطع من سياقه تعرضت الفنانة لموجة من التنمر الإليكتروني الغير عادي، ولكن ده مغيرهاش ومهزش ثقتها بنفسها، ولسه بتشاركنا بمقطتفات جميلة من حياتها.

آخر كلمة: ليه ياسمين صبري أسعد واحدة في 2020؟

تعليقات
Loading...