الألعاب طول عمرها وسيلة بتجمع الناس على حاجة لذيذة، وخير مثال على ده لعبة بابجي اللي انتشرت من فترة وبقت بتجمع الناس لساعات في مغامرات بتشد الأعصاب وبتشبع حاجتنا للإثارة والتواصل الإجتماعي والمشاركة مع الأخرين. وعلشان ألعاب الفيديو الجديدة مش بس مسلية ولكن كمان بتقدم قصة حلوة وفيها شخصيات عميقة، بقت الألعاب في نفس أهمية أفلام السينما.
لو بتحب ألعاب الفيديو، ولعبت كل حاجة تقريبًا، أو لو ماتعرفش غير بابجي ونفسك تجرب حاجة جديدة ومش عارف تجرب إيه، في المقال ده هنتكلم عن أهم سبع ألعاب فيديو ممكن تجربهم.
ذا لاست أوف آس الجزء الأول والتاني
لعبة رعب من نوعية الألعاب اللي الهدف الأساسي منها إنك تفضل عايش وسط مغامرة خطيرة. وبتدور أحداثها في الولايات المتحدة بعد نهاية العالم، اللي دمره فطر بيصيب البشر وبيتسبب في تحولهم لوحوش بتاكل الناس.
اللعبة اللي اتصممت لأجهزة البلايستيشن أربعة وخمسة، وأجهزة الويندوز 2013 لها جزئين، وهي من إنتاج شركة شركة سوني واستديوهات بلايستيشن. واتعمل عنها مسلسل في 2023 بنفس الأسم.
ستار وارز جيدي: سيرفايفور
هي لعبة مغامرات هيتم اطلاقها يوم 28 من شهر ابريل 2023، ومن إنتاج شركة ريسبوان، وهي الجزء التاني من لعبة حرب النجوم: انهيار النظام Star Wars Jedi: Fallen Order.
اللعبة متصممة لأجهزة الويندوز وبلايستيشن خمسة، وأجهزة الإكس بوكس إكس وأس Xbox Series X / S. وبتستمر في اللعبة قصة البطل كارل كيستيس، بعد خمس سنين من أحداث لعبة رب النجوم: انهيار النظام. ومقاومته البائسة لانهيار المجرة أكتر وأكتر في اتجاه الظلام.
ريزيدينت إيفيل: نسخة جديدة من الجزء الرابع
هي لعبة رعب هدفها الأساسي إنك تفضل عايش وسط الأحداث المرعبة والخطيرة اللي بتمر بيها، واللعبة لسه نازلة السنة دي 2023، من إنتاج شركة كابكوم، ومتصممة لأجهزة البلايستيشن أربعة وخمسة.
واللعبة هي النسخة الجديدة من نفس اللعبة بتاعت 2005، وبتلعب بشخصية العميل الأمريكي ليون كينيدي، اللي مهمته هي إنقاذ آشلي جراهام، بنت رئيس الولايات المتحدة، من جماعة لوس إيلومينادوس الشريرة.
جوست أوف تسوشيما
اللعبة من إنتاج شركة ساكر بانج برودكشنز Sucker Punch Productions، تم انتاجها سنة 2020 لأجهزة البلايستيشن أربعة وخمسة. وتقدر تلعبها لوحدك أو تشغل نظام اللعب الجماعي علشان تلعبها مع أكتر من حد من صحابك.
هتلعب فيها بشخصية جين ساكاي، وهو ساموراي في مهمة لحماية جزيرة تسوشيما اليابانية خلال الغزو المغولي الأول لليابان. واللي بيميز اللعبة هو الجرافيك المتطور جدًا اللي بيظهر فيها، والمناظر الجميلة لليابان اللي بنشوفها في اللعبة.
ديد سبايس: النسخة الجديدة
لعبة الرعب الجديدة اللي بتعتمد على غريزة البقاء تم إطلاقها السنة دي 2023، من نإتاج ستوديوهات موتيف، وهي النسخة الجديدة من نفس اللعبة اللي انطلقت سنة 2008.
اللعبة متصممة لأجهزة البلايستيشن خمسة وأجهزة الإكس بوكس. وفيها هتلعب بشخصية البطل آيزاك كلارك، اللي نجى من انتشار مرض النيكروفاج اللي حوّل كل اللي حواليه لوحوش على سفينة تعدين في الفضاء.
أساسينز كرييد: العودة للأصول
هي اللعبة العاشرة من سلسلة الألعاب المشهورة “عهد القتلة” أو assasians، وصدرت لعبة عهد القتلة: العودة للأصول سنة 2017، من إنتاج وتصميم شركة يوبيسوف مونتريال. ومتصممة لأجهزة الويندوز وبلايستيشن أربعة، وإكس بوكس وان.
بتدور أحداث اللعبة في مصر القديمة، وفي العهد البطلمي، أثناء فترة حكم الملكة كليوباترا، وبيحكي بداية ظهور جماعة القتلة. واللي بيميز اللعبة جدًا هو دقتها التاريخية في تصوير مصر القديمة في الوقت ده.
دووم إيتيرنال
اللعبة هي تكملة للعبة Doom اللي نزلت سنة 2016، واللعبة الجديدة صدرت في مارس من سنة 2020 لأجهزة بلايستيشن أربعة وخمسة، وإكس بوكس وان، وأجهزة الويندوز.
القصة بتدور حوالين الشخصية الرئيسية Doom Slayer اللي بيرجع مرة تانية في مهمة هدفها هو السيطرة على الجحيم اللي بيستهلك العالم، ويواجه خطة مايكرس الغريبة لإبادة البشرية.
لو تعرف ألعاب فيديو تانية تنصحنا نجربها، سيب لنا اسمها ومعلومات عنها في الكومنتات، وقول لنا هتجرب إيه من الألعاب اللي فوق.