بقالنا أكتر من أسبوعين في جدل بخصوص أزمة فيلم كيلوباترا بعد عرض إعلانه على منصة نتفلكس وظهرت بطلته سمراء على الشاشة، وانتشرت اتهامات بتزييف التاريخ، ودعم (المركزية الإفريقية) أو (الأفروسنترزم)، اللي بتنسب ملكية الحضارة المصرية القديمة للعرق الإفريقي.
ومن وقتها ماكانش فيه أي رد من منصة نتفلكس اللي من المقرر تعرض الفيلم، وأول خطوة اعتبرها الجمهور رد فعل هو تغيير المسمى لفيلمها الوثائقي المثير للجدل “الملكة كليوباترا” من فيلم وثائقي لفيلم خيالي من وجهة نظر المنصة.
وتغيير المعلومات الخاصة بالفيلم على موقع “IMDB” العالمي اللي بيعتبر قاعدة بيانات عالمية للأعمال السينمائية والتليفزيونية وبرضه تم تعديل الفيلم من فيلم وثائقي لفيلم خيالي وثائقي ولكن لحد دلوقتي ماصدرش أي تصريحات بوقف الفيلم المقرر عرضه 10 مايو.
لو لسه متعرفش الأخبار العظيمة دي..بعد هبوط تقييمات نتفليكس في عدة دول بشكل كبير والخسارة اللي تكدبتها خلال الاسبوع اللي…
Posted by وعي – مصر on Tuesday, April 25, 2023
وفي نفس الموضوع، الإعلامي بيرس مورغان في قناة “TalkTV” البريطانية قدم حلقة جابت الرأي والرأي الأخر بخصوص الأزمة، وفي محاور شايف إننا لحد دلوقتي مش متأكدين من أصل كيلوباترا وإن المصريين مش مقتنعين لحد دلوقتي إن لهم أصول أفريقية وإن أفريقيا مش كلها بلون واحد وبالتالي على أساس إيه نميز بين لون البشرة والجنسية.
وعلى الجانب التاني، محاور آخر كان شايف وجهة نظر مختلفة تمامًا وهي إن الموضوع مش مرتبط بأصحاب البشرة البيضاء أو السمراء، ولكن مرتبط بعملية الاستحواذ الثقافي وفلسفة التاريخ اللي بيقوم بها أتباع المركزية الإفريقية (الأفروسينترك). وإن الحركة دي بدأت في القرن الماضي بهدف تعليم الأمريكيين من أصول إفريقية التاريخ الغني لغرب إفريقيا، زي الإمبراطورية العظمى لبنين وغانا ومالي، وبالتالي هتلاقي أشخاص زي كيفن هارت بيؤمنوا بالنظرية وبيدعي إن أجداده هما اللي بنوا الأهرامات مع إن أجدادهم كان لهم حضارة رائعة في غرب أفريقية.
وفي تصريحات جديدة للدكتور زاهي حواس عالم الأثار المصري، قال: “الملكة كليوباترا مقدونية الأصل، ولما تشوف النقوش الموجودة في المعابد الأثرية هتلاقي إن الملوك في الحروب بيقاتلوا الأعداء سواء الإفريقى أو الآسيوى، وشكلهم يختلف تمامًا عن شكل الملك الفرعوني”.
زاهي حواس خلال تصريحاته أعلن إنهم على وشك الإنتهاء من فيلم تسجيلى للرد على الإدعاءات و هيتكلم عن حقائق خاصة بالملكة كليوباترا، وهيتم عرضه أول مايو.