قضايا تهريب الأموال بنسمعها كل يوم، بس اللي بيفرق كل قضية عن التانية هو التكنيك والحيلة المستخدمة، وده اللي عرفناه بعد ما أصدرت محكمة بريطانية وبالتنسيق مع السلطات الإماراتية أحكامًا بالإدانة على 11 من مواطنين المملكة المتحدة بتهم تهريب 130 مليون دولار من المملكة لدبي.
الشبكة قدرت تخبي الدولارات في شنط سفر على متن رحلات درجة الأعمال، ولإن المبلغ كبير عملوا العملية دي على 83 رحلة منفصلة بين نوفمبر 2019 وأكتوبر 2020، العملية دي أشرف عليها زعيم العصابة عبد الله الفلاسي، واللي اتحكم عليه بالسجن لأكثر من تسع سنين في يوليو اللي فات، ومن ضمن أفراد العصابة اللي تم إعلان القبض عليهم: ( بياتريس أوتي، جوناثان جونسون، وجو إيما لارفين)
وحاليًا أعلنت الوكالة الوطنية لمكافحة الجريمة المنظمة (NCA) في المملكة المتحدة إنها بتلاحق ميشيل كلارك المسؤولة عن إدارة مجموعة من مشاهير الشبكات الاجتماعية على واتس اب (مجموعة باسم صن شاين أند لوللي بوبس Sunshine and Lollipops)
كل واحد من أفراد العصابة كان بياخد مقابل 3700 دولار على كل رحلة وكانوا بيسافروا على متن الرحلات اللي بتتيح وزن أكبر للأمتعة والمتعلقات، وعملوا مجموعة على الواتساب للتخطيط.
أوتي بالتحديد قدر يهرب 4.2 مليون دولار. وكان بيشارك في الترتيبات اللوجستية لـ 16 رحلة تانية ومرافقة المسافرين لمطار هيثرو وتجميع الحقائب الفارغة بعد رجعوهم لاعادة استخدامها.
الأموال كان بيتم تعبئتها وإفراغها من الهوا وبيتم رشها بالقهوة أو المعطرات لتضليل كلاب أفراد الجمارك، حاليًا بيخضع عدد من المهربين البريطانيين للتحقيق في الإمارات العربية المتحدة ومايقدروش يسيبوا الإمارات حتى اكتمال التحقيقات من السلطات الإماراتية.
العملية دي فكرتنا بمسلسل 100 وش، العصابة اللي خدعت البنوك علشان ياخدوا 100 مليون جنيه وبعدها توالت الأعمال.