كن لطيفاً: حاجات نعملها وترسم الابتسامة على وشوش اللي حوالينا

13 نوفمبر بيوافق يوم “اللطف العالمي” يوم معمول لنشر السعادة والسلام والمحبة لينا وللناس اللي حوالينا، هدفه رسم الابتسامة على وشوش الناس اللي نعرفها واللي مانعرفهاش، يوم بيفكرنا بالقيم والسلوكيات الطيبة اللي اتربينا عليها بس ممكن يكون جيه عليها شوية تراب مع زحمة الحياة.

والنهارده واحنا بنحتفل معاك باليوم ده، هنقولك على شوية حاجات بسيطة تقدر تنشر بها “لطفك” وترسم بها الابتسامة للناس اللي حوليك.

ابعت رسالة لحد بتحبه وقوله “شكراً على وجودك”


ارفع سماعة التليفون أو ابعت رسالة يتفاجئ بها حد أنت بتحبه ومهم في حياتك، ممكن يكون غيرك للأحسن أو كان إضافة لك أو علمك حاجة ولو بسيطة، أو كان جنبك في أصعب أوقاتك وقوله “شكرًا” كلمات الشكر بتفرق كتير مع نفسية الأشخاص، بيحسوا وقتها بتقدير وجودهم في حياتك.

عن: بوابة دريم

وزع ابتسامات كل يوم الصبح

عارفين إن الحياة ممكن تكون مليانة بصعوبات وضغوطات، وبتلاقي ناس بتصحى بالعافية وهي مش قادرة حتى تواجه الحياة، بس ممكن لما تبدأ يومك بابتسامة في وش كل اللي تقابلهم وتقولهم صباح الخير، هيفرق معاهم وهيفرق معاك لما تحس إنك كنت سبب في ابتسامة حد، صبح على الراجل اللي بتشتري منه فطارك، ابتسم في وش الناس اللي بتركب معاهم في المترو، صبح على جارك لما تقابله على السلم، وعلى رأي كايروكي “اضحك والضحكة تبقى ضحكتين”.

شجع زمايلك في الشغل وحسسهم بتقديرك لجهودهم

مش شرط تكون مدير أو مسؤول علشان تمدح زميل ليك في الشغل، ومش لازم يبقى لك مصلحة من ده، لو أنت حاسس ومقدر اجتهاده وشايف ده قصاد عينيك، إيه المانع إنك توصلله إنك واخد بالك ومقدر ده؟ مقدر اجتهاده وإنه كتير بيشيلك في وقت أنت مش بتبقى موجود فيه أو مش قادر من غير ما يقول وأنا مالي أو يشتكي.

ادي لأسرتك يوم أجازة


الأهل شالونا ولسه بيشلونا من أول ما اتولدنا، من واحنا لسه بنتعلم الكلام والمشي لحد ما كبرنا واتخرجنا، في أيام المذاكرة والدراسة والامتحانات وأيام ماكناش قادرين فيها نواجه العالم، وعمرهم ما طلبوا أجازة من واجباتهم ناحيتنا، ففيها إيه لو نشيل عنهم ولو ليوم واحد، ونحسسهم إننا مقدرين تعبهم، يعني ادخل أنت اعملهم أكلة حلوة أو اعزمهم برا على حاجة بيحبوها، لو في أعمال يومية متعودين يعملوها كل يوم في البيت اعملها أنت، لو في مشاوير مش قادرين يروحوها روحها أنت وانجزها بدالهم.

عن: مجلة

اتبرع بهدومك اللي مش محتاجها

هدوم بقالها سنين ومش بتقرب لها، صغرت أو مابقتش تيجي عليك، ولسه جديدة، اتبرع بها للي محتاجها، اغسلها واكويها وغلفها في أكياس وخلي شكلها حلو، وروح وزعها بنفسك على ناس محتاجين أنت تعرفهم أو في جمعيات متخصصة في التوزيع وبتعرف تودي الحاجات للي يستحقها.

ساعد حد ماتعرفوش

لو قابلت حد كبير في السن وأنت ماشي في الشارع وبيواجه صعوبة في المشي، وكل شوية يقف ومش قادر يشيل حاجة معاه، استأذنه في إنك تشيل معاه وتساعده أو تمشي معاه في الطريق وتمسك بإيده، لو لقيت بنت صغيرة مش عارفة تعدي العربيات وكل شوية تقدم رجل وتأخر رجل، ساعدها علشان تعديه حتى لو شاورت للعربيات بإيدك علشان توقفها لحد ما تعدي.

حاجات كتير بسيطة ممكن نعملها تساعد غيرنا وترسم الابتسامة الدافية على وشوشهم، بس برضه ماتنساش تقدم اللطف ده كمان لنفسك.

آخر كلمة: ماتفوتوش قراءة: الاحتضان في مصر بين التقبل والرفض: حوارنا مع يمنى دحروج

تعليقات
Loading...