العمارة الإسلامية في المساجد: تاريخ طويل من العراقة والجمال

العمارة الإسلامية معروفة بتميزها وزخارفها اللي بتخطف الأنظار من بداية عهد الخلافة الإسلامية حتى وقتنا الحالي، ومن أكتر المباني اللي بيحرص المسلمون على الإبداع في تصميمها هي دور العبادة أو المساجد اللي عن طريقها بنقدر نعرف قصص التطور الحضاري للمنطقة اللي موجودة فيها. وعلى الرغم من الاحتفاظ بالجوهر الأساسي لبناء المساجد، إلا إنها بتختلف في تصميمها من منطقة للتانية نتيجة لتأثرها بالبيئة وثقافة الشعوب اللي بتتبني فيها.

إحنا جمعنا قائمة بمجوعة من أجمل وأكبر المساجد حول العالم علشان نرصد التطور في الإبداع وعمارة دور العبادة.

المسجد الحرام في مكة المكرمة

المسجد الحرام هو قبلة المسلمين في صلاتهم، وهو أعظم مسجد في الإسلام. ابتدى عهد التجديدات والتوسعات فيه في عهد عمر بن الخطاب رضي الله عنه، ومن وقتها استمرت عمليات التطوير فيه وتوسيعه على مر العصور لأنه مكنش بيقدر يستوعب أعداد المصليين المتزايدة اللي بتجيله من مُختلف دول العالم. المسجد الحرام حالياً يعتبر أكبر مسجد في العالم بقدرة استيعاب تصل لأكتر من 2 مليون مُصلي. كل ركن فيه شاهد على تطور العمارة الإسلامية والتكنولوجيا اللي بتستخدمها المملكة العربية السعودية أفضل استخدام علشان تخدم ضيوف بيت الرحمن.

المسجد الأزرق في اسطنبول

• 

هو من أهم وأشهر المعالم السياحيّة الموجودة في مدينة إسطنبول بتركيا، والمسجد ده اتبنى بين سنة 1609 و 1616م بأمر من السلطان أحمد الأول. وسمي بالأزرق لوجود أكثر من 20 ألف بلاطة مصنوعة يدوياً من السيراميك، ودي اللي بتزين المناطق الداخلية للمسجد وبتضم تصميمات مُختلفة على شكل الزهور والقرنفل.

تصميم المسجد ييضم عناصر معمارية مسيحية مأخوذة من آيا صوفيا المقابل له، فالسلطان أحمد كان هدفه من بناءه إنه ينافس آيا صوفيا ويبني مسجد أضخم وأجمل منه.

مسجد بيبي خانوم بسمرقند، أوزبكستان

• 

مسجد بيبي خانوم هو واحد من أشهر معالم سمرقند في أوزبكستان بوسط آسيا ويلقب بـجوهرة سمرقند. المسجد ده بيرجع تاريخ بنائه لسنة 1403 م. واتسمى بيبي خانوم نسبةً لزوجة الأمير تيمور الأعرج اللي أمر ببناءه، وده لمكانتها المميزة عنده ولمساهمتها في بناءه وتعميره ببعض مالها وثروتها.

بيتميز تصميم المسجد ده بأنه بيجمع بين تخطيط المساجد الجامعة الأولى اللي فيها الصحن المكشوف والمظلات الأربع، وتصميم المدارس ذات الإيوانات الأربعة، فالتصميم بتاعه بيمثل مزيج بين كل ده وبين استخدام القباب.

الجامع الأموي بدمشق

الجامع الأموي في العاصمة السورية دمشق هو خير شاهد على مراحل تطور فنون العمارة والزخرفة والبناء في سوريا على مر العصور. بناه الخليفة الأموي الوليد بن عبدالملك سنة 705م، وهو أشهر آثار دمشق القديمة وأكثرهم جذباً للسياحة.

المسجد الأموي بيتميز بكونه أول مسجد ظهر فيه المحراب والحنية، وده نتيجة طراز بناءه المأخوذ عن كنيسة يوحنا المعمدان اللي اتبنى الجامع على أنقاضها.

مسجد قول شريف في روسيا

• 

يقع مسجد قول شريف في قازان بتتارستان في روسيا الاتحادية، وبيرجع تاريخ بناءه للقرن 16 الميلادي. اتسمى المسجد نسبة للقائد قول شريف اللي مات وهو بيدافع عن مدينة قازان سنة 1552م ضد القوات الروسية، واتدمر المسجد في نفس السنة لحد ما تمت إعادة بناؤه بدءًا من سنة 1996م لحد سنة 2005م.

وهو واحد من أكبر المساجد في أوروبا وبتبلغ مساحته 19 ألف متر مربع، وبيحتوي المسجد على متحف ومكتبة كبيرة موجود ضمنها أكبر مصحف في العالم بطول مترين وعرض متر ونص، وهو مطبوع على الورق الاسكتلندي.

مسجد الحسن الثاني في المغرب

• 

مسجد الحسن الثاني موجود على ساحل مدينة الدار البيضاء في المغرب. فتح المسجد أبوابه للمصلين سنة 1993م، وبيتميز ببنائه الضخم و تصميمه الفريد و زخارفه الرائعة المستوحاة من طراز العمارة العربية الأندلسية المغربية اللي فيها شبه من كنائس أسبانيا. المسجد بيضم مدرسة لعلوم القرآن، وهو سابع أكبر المساجد في العالم.

يقع مسجد الحسن على جزء من البحر، وبيتميز بوجود أرضية زجاجية بتسمح للزائرين بمشاهدة المحيط الأطلسي، وهو كمان بيتميز بجدرانه الرخامية المصنوعة يدوياً وسقفه القابل للطي.

آخر كلمة: نفسك تزور أنهي مسجد فيهم؟