مسلسلات رمضان والعنف ضد المرأة: عرض قضية ولا ترويج للفكرة؟

في السباق الرمضاني اللي بيشارك فيه نجوم كتير بمسلسلات مختلفة، بقصص وحكايات وأنواع مختلفة من الدراما، للأسف لسه بنشوف مشاهد كتير فيها عنف ضد المرأة، كمان تنوعت أنواع العنف دي من عنف جسدي وضرب، لتحرش، لترهيب وعنف نفسي وتهديد، لدرجة إن الموضوع وصل لتهديد الزوج لزوجته بفيديوهات ليها وهي في البيت! كمان الموضوع مش بس عنف الرجل ضد المرأة، شوفنا كمان عنف المرأة ضد المرأة، ليه لسه بنشوف نماذج مشاهد زيّ دي في المسلسلات بترجعنا ألف خطوة لورا، بعد ما بناخد خطوات كتير إيجابية لوقف العنف في العموم، والعنف ضد المرأة خصوصًا.

في مسلسل اللي مالوش كبير، بطولة ياسمين عبدالعزيز وأحمد العوضي وخالد الصاوي، شوفنا مشاهد لعنف جسدي ضد الشخصية اللي بتقوم بيها ياسمين عبدالعزيز، من زوجها، واللي بيقوم بدوره خالد الصاوي، بنشوفها بتتعرض للضرب والعنف الجسدي بصورة مستمرة، بل إن كمان العنف الجسدي بدأ من أهلها.

أما في مسلسل حرب أهلية، بطولة يسرا وباسل خياط وأروى جودة، شوفنا مشاهد تعنيف من الشخصية اللي بيقوم بيها باسل خياط ضد زوجته، اللي بتقوم بتمثيلها أروى جودة، من ضرب وسحل وحبس، مشاهد ماينفعش نشوفها خصوصًا بعد أميال كتير قطعناها للقضاء على العنف وتعزيز مكانة المرأة.

وفي مسلسل نسل الأغراب، شوفنا عنف الزوج للزوجة، بضرب غفران اللي بيقوم بدوره أمير كرارة، لزوجته جليلة اللي بتقوم بدورها مي عمر، مش بس كده، شوفنا كمان عنف المرأة ضد المرأة، بضرب جليلة لزوجة أخوها في نفس المسلسل، ومشاهد لتحرش لفظي وجسدي في مسلسل لحم غزال بطولة غادة عبدالرازق، ومحاولات التعدي عليها. ده غير اللي شوفناه في مسلسل ضد الكسر، بطولة نيللي كريم ومحمد فراج، ومشاهد لمحاولة تحرش صديق بزوجة صديقه.

انتشار مشاهد زيّ دي بمختلف أنواع العنف، بتعمل حالة من التطبيع للأفعال دي وكإننا بنقول إن ده عادي يكون سلوك طبيعي بنمارسه في حياتنا اليومية، على الرغم من آراء بعض الفنانين والقائمين على صناعة الدراما، اللي بيقولوا إن عرض المشاهد دي والتركيز على النماذج دي في المسلسلات هدفه عرض القضية لتقليل الظاهرة وإنهم يظهروا إنه فعل مشين لازم نبعد عنه.

آخر كلمة: ماتفوتوش قراءة: بعد تصريحات إيساف الصادمة تجاه المرأة.. أعمال وقضايا قادتها الستات بكل قوة

تعليقات
Loading...
Tweet
Share
Share
Pin