احنا دايمًا في رمضان بعيدًا عن المسلسلات والبرامج، بندور على كارتون نشوفه قبل الفطار ويفكرنا برمضان بتاع زمان وقت لما كان بيشتغل بكار بعد الأذان بصوت الكينج محمد منير، عدى وقت كبير بعد بكار وماجاش عمل على نفس المستوى من الجماهيرية، أو مارتبطش بيه الجمهور أوي وعلق معاهم.
بس آخر كام سنة كده ظهر كارتون جديد اسمه “فنانيس” كان بيتعرض على مجموعة Mbc ولفت نظر الناس أول لما طلع، ظهر أول مرة وكان من ضمن فواصل إعلانية بتتعرض على القناة وأغنية اتعملت مخصوص لرمضان بتضم شخصيات فنانيس، الناس وقتها انبهرت بالمجموعة كلها وعملت تفاعل كبير على السوشيال ميديا، ومؤخرًا اتعمل منه فوانيس وحاجات مصنوعة باليد أو هاند ميد وأبليكيشن فيه مجموعة فنانيس كلها، واسكتشات من أعمال مشهورة زيّ مسرحية العيال كبرت ومدرسة المشاغبين.
المبهر كمان إن مصممين الشخصيات دي هما تلات شباب مصرية واللي بيكونوا: إسلام أبو شادي وعمرو شعلان وأحمد عبد الوارث، واستمر تصميم الشخصيات لمدة 6 شهور.
تعالوا نشوف مجموعة من الحاجات المميزة في كارتون فنانيس.
أغنية رمضان
أول ظهور لعيلة فنانيس على الشاشة كان من خلال أغنية رمضان يجمعنا.
الفواصل الإعلانية
قبل ما يعملوا اسكتشات لفنانيس، كانوا بيظهروا بين الإعلانات في مواقف لذيذة تصبرك على طول الفقرة الإعلانية.
اسكتشات فنانيس
مش بس الصغيرين اللي اتعلقوا بفنانيس، الكبار كمان لدرجة إنهم سموهم “بهجة رمضان” “والعيلة المفضلة في رمضان” وده من كم البهجة اللي بتدخل عليك لما تشوفهم في مواقف عفوية ولذيذة.
فوانيس وحاجات هاند ميد
مجموعة صور من شخصيات فنانيس الكرتونية.
أسباب كتير تقدر تقول عليها بتجبرك إنك تشوف الكارتون ده، يمكن علشان مفتقدين حاجة بالروح والخفة دي في رمضان بعد بكار، أو يمكن علشان خفة دم الشخصيات وعفويتهم، أو فكرة التعلق نفسها بأي حاجة كنا بنعملها في الطفولة. كل دي أسباب بس الأكيد إنها اتعملت علشان ترسم الضحكة على وشك كل ما تتعرض ولمدة شهر واحد في السنة علشان تفضل مستنيها بشغف السنة اللي بعدها.