كأس العالم لكرة اليد السنة دي في مصر، ودي كل حاجة محتاج تعرفها عنه

يومين بس بيفصلونا عن انطلاق بطولة العالم لكرة اليد اللي تقرر النسخة دي انعقادها في مصر، ورغم انتشار وباء كورونا وإغلاق حدود دول كتير حوالين العالم، لكن مصر وعدت العالم ببطولة مالهاش مثيل هيقدر يستمتع بيها كل محبي اللعبة من الدول المختلفة في ظروف وقائية عالية هتضمن عدم انتشار العدوى بين أفراد الفرق المشاركة أو المشجعين.

والبطولة هتبدأ يوم الأربعاء 13 يناير وهتستمر لحد يوم 31 من الشهر نفسه، وهيشارك فيها 32 دولة متقسمين على 8 مجموعات، والمباريات هتتلعب في 4 صالات مغطاة، وهما صالة استاد القاهرة الدولي، وصالة العاصمة الإدارية، وصالة 6 أكتوبر، وصالة استاد برج العرب، والسنة دي المنتخب المصري هيكون في المجموعة السابعة وهيلعب الماتش الافتتاحي ضد منتخب تشيلي يوم الأربعاء اللي جاي الساعة 7 بتوقيت القاهرة.

اقرا كمان: “حورس” تميمة كأس العالم لكرة اليد 2021 في مصر بمشاركة ست منتخبات عربية.

مصر تاريخها معروف ومشرف في كرة اليد، وآخر إنجازاته كانت في أغسطس 2019، لما فاز منتخب الناشئين ببطولة العالم لكرة اليد في المباراة النهائية ضد ألمانيا في إنجاز تاريخي.

أما بالنسبة للإجراءات الاحترازية، فأكد وزير الشباب والرياضة المصري أشرف صبحي إن مصر بتبذل أقصى مجهود علشان تواجه تحدي إقامة البطولة في ظل انتشار موجة جديدة من فيروس كورونا المستجد، إلا إن خبرات مصر في تنظيم بطولة كأس الأمم الأفريقية للكبار لكرة القدم، وبطولة كأس الأمم الأفريقية للشباب المؤهلة لدورة الألعاب الأولمبية، وكون كرة اليد تاني أكتر رياضة شعبية بعد كرة القدم، فالدولة المصرية واثقة من قدرتها على مواجهة التحدي.. وأكد الوزير إن اللجنة العليا المنظمة للبطولة برئاسة الدكتور مصطفى مدبولي رئيس مجلس الوزراء متابع كل صغيرة وكبيرة ومستعدة لتنظيم البطولة بشكل مشرف وصحي.

وفي إطار التعليمات دي، تم إنشاء “فقاعة طبية” مضمون إنها خالية من الفيروس بإجراءات تعقيم دورية، معزول فيها كل المشاركين في البطولة من لاعيبة لأجهزة فنية وأطقم طبية.. وتم إصدار قرار بإن قبل وبعد كل ماتش اللاعبين من كل فريق هيتم إجراء مسحات ليهم للتأكد من عدم إصابة أي لاعيب، وأربع فنادق قرروا استضافة منتخبات البطولة، اللي تم تقسيمها إلى مجموعتين في كل فندق بحيث يكون في 8 منتخبات في الفندق الواحد.. وأكد هشام نصر، رئيس اتحاد كرة اليد ورئيس اللجنة المنظمة لبطولة العالم لليد مصر 2021، بإن كل العاملين بالفندق تم منع خروجهم من الفقاعة الطبية طوال فترة الحدث علشان يتم منع انتشار الفيروس بأي شكل من الأشكال.

وفي محافظة الأسكندرية، الاستعدادات للبطولة كانت مختلفة، وقرروا يحطوا تمثال للاعب كرة يد في مدخل المحافظة على الطريق الصحراوي علشان يرحبوا باللاعيبة اللي هيزوروا عروس البحر المتوسط خلال المونديال.

وبالنسبة للحضور الجماهيري، كان من المقرر إنه يكون نسبة الجمهور 20% من سعة الصالة اللي هيتلعب عليها الماتش، بس إمبارح طلع قرار بإقامة البطولة بدون جماهير خوفًا من انتشار الفيروس.

وهيتم بث البطولة على قناة 3 ONTIME SPORTS، وصرح المهندس حسام صالح المتحدث باسم  الشركة المتحدة للخدمات الإعلامية إن أون تايم سبورت 3 هي أحدث قنوات المجموعة اللي هتبدأ البث على تردد 12303 أفقي على النايل سات.

وعلى الجانب الترفيهي، أعلن الفنان المصري تامر حسني إنه وقع عليه الاختيار علشان يقدم أغنية “إرفع ايدك” اللي هتكون الأغنية الرسمية للمونديال، واللي هيغنيها هو والرابر المصري مروان موسى والصوت الجديد هدى الشربيني.

آخر كلمة: مستنيين البطولة دي بفارغ الصبر!

تعليقات
Loading...
Tweet
Share
Share
Pin