#سكوب_أمل: أول مطعم للمكفوفين في مصر.. منين جات الفكرة؟

عاطف الحوت، طبعًا هتسألوا مين عاطف الحوت ده؟ هو شخص مصري جاتله فكرة إنه يحول مطعمه لإنه يبقى مطعم للمكفوفين بيوفر منيو الأكل بلغة البرايل، وهي اللغة المخصوصة للمكفوفين، علشان يقدروا يقروا ويختاروا أكلهم ويعرفوا مكوناته وأسعاره من غير ما يطلبوا مساعدة من حد.

عن: alroeya

والقصة ابتدت لما عاطف فتح مطعمه من 8 شهور، ودخله زبون كفيف وخد وقت كتير جدًا وهو بيسأل واحد من العاملين في المطعم عن الأكل والمكونات والأسعار، وده خلاه يتحرج، وطلب أي حاجة بسرعة من غير ما يعرف تفاصيل باقي المنيو أو الأكل اللي طلبه، فمن هنا فكر عاطف إنه يحول مطعمه ويبقى صديق للمكفوفين بعد الاستعانة بواحد صاحبه مهتم بقضايا المكفوفين.

عن: twitter

وتحويل المطعم من مطعم عادي لمطعم بيخدم المكفوفين ماكنتش فكرته كلها في إنه يغير منيو الأكل بس للغة برايل، ولكن كمان درب اللي شغالين في المكان، ويتعلموا إزاي يتعاملوا مع المكفوفين.

حاجات بسيطة زيّ دي ممكن أي بني أدم عادي يعملها يساعد بيها ناس تانية ويسهل عليهم معاناتهم، وهي ممكن تكون بسيطة في فكرتها أو التحضير ليها بس عندنا كلنا لما بنشوفها وبنعرفها بتبقى حاجة كبيرة جدًا في نظرنا، إننا لسه حاسين ببعض، ولسه في ناس جواها خير تقدر تعمله تساعد بيه غيرها، ويدينا أمل في بكره إنه هيبقى أحسن طول ما فيه ناس زيّ صاحب المطعم.

آخر كلمة: ماتفوتوش قراءة: #سكوب_أمل: أسطورة الفيوم.. كفيف بيصلح الأجهزة المنزلية والكمبيوتر

تعليقات
Loading...
Tweet
Share
Share
Pin