“دراجتك…صحتك” مبادرة جديدة لتشجيع ركوب العجل في مصر

أعلنت وزارة الشباب والرياضة المصرية عن توفير 1000 دراجة بسعر مدعم للمواطنين ضمن مبادرة “دراجتك…صحتك”، وده بغرض توسيع قاعدة الممارسة الرياضية في مصر بحيث تكون أسلوب حياة في البلد، بالإضافة للأهداف البيئية اللي بتهدف المبادرة لتحقيقها.

الدراجات اللي بتعرضها الوزارة هي دراجات هجينة بتناسب الطرق الممهدة من مقاس 28، ودرجات جبلية بتناسب كل أنواع الطرق حتى الغير ممهدة من مقاس 26، وكل الدراجات دي مصنوعة في مصر، وأسعارها بتتراوح بين 1932 و 2362 جنيه مصري.

بواسطة: فيسبوك

المبادرة دي بتساهم في تخفيض أسعار الدراجات في السوق المصري بنسبة 25%، وبمجرد الإعلان عنها، حصل إقبال كبير على موقع وزارة الشباب والرياضة لشراءها، وتم حجز تقريباً كل الدراجات اللي معروضة فيه، بس الخبر الحلو هنا إن لسه في فرصة للإستفادة من المبادرة لأن الوزارة أعلنت إنها بتشتغل حالياً على إنتاج عدد أكبر من الدراجات بأسعار مخفضة بالتعاون مع الهيئة العربية للتصنيع.

رياضة ركوب الدراجات انتشرت بشكل كبير في مصر خلال السنين القليلة اللي فاتت بين الشباب، وبقينا دايمًا بنشوف تجمعات ركوب العجل اللي بتنطلق في جولات متحددة بمواعيد وأماكن معينة زيّ Go Bike اللي بينظموا جولات للأماكن السياحية، و بدال اللي بينظموا مارثونات، وجولات عجل صباحية، وكمان بيعلموا ركوب العجل لكل الأعمار.

ولأهمية ركوب العجل في الحفاظ على صحة الإنسان، وتنشيط عضلة القلب والأوعية الدموية، والمساهمة في الحد من الزحام والتلوث البيئي الناتج عن وسائل المواصلات التانية، ابتدت الحكومة المصرية تدعم الرياضة دي بشكل كبير مؤخرًا. فقبل المبادرة الحالية كان في مبادرة “دراجة لكل مواطن” اللي اتضمنت إيفينتات ومارثونات شارك في بعضها رئيس الجمهورية بنفسه، وكمان ابتدت الجامعات المصرية خلال الشهور القليلة اللي فاتت في تطبيق نظام الدراجات التشاركية اللي بيكون فيها محطات للدراجات جوا الحرم الجامعي وبيقدر الطلاب يستخدموها مقابل تكاليف بسيطة.

آخر كلمة: مبتعروفش تركبوا عجل؟ مش مشكلة في أماكن كتيرة تقدروا تتعلموا فيها زي دوسي وبدال.

تعليقات
Loading...
Tweet
Share
Share
Pin