استخدم رمضان ده علشان تكون شخص جديد عايش بشكل صحي

يعتبر شهر رمضان المبارك الفرصة المثالية اللي تقدر من خلالها تتبنى عادات جديدة وصحية. الخبراء بيقولوا إنك محتاج 21 يوم علشان تبني عادة جديدة، وبما إن رمضان 30 يوم فده أحسن وقت تقدر تبدأ فيه.

احنا كلنا بنمارس عادات متعودين عليها كل يوم من غير ما ندرك احنا بنعمل ايه، سواء كان الأكل اللي بنختار ناكله أو الأفكار اللي موجودة في أذهانا، او السلوكيات اللي بنمارسها في مجتمعنا، و إزاي بنتاعمل مع الناس حولينا.

لما بتدخل عادات صحية وايجابية في روتينك اليومي، ده بيحسن حياتك واتجاهاتك في الحياة. وعلشان تحقق هدف معين سواء بقى تخس أو اهداف مالية أو يكون عندك علاقة اجتماعية صحية وسليمة وهكذا، لازم تقرر في الأول وتعرف إيه هي العادات الضارة اللي إنت عاوز تغيرها وايه هي العادات الجديدة اللي عاوز تتبناها.

أحسن وأسهل حاجة ممكن تعملها رمضان ده هي إنك تغير النظام الغذائي بتاعك.

الصيام لساعات طويلة وبعدين الفطار على كميات كبيرة من الأكل مرة واحدة مش هيساعدك توصل للأهداف الصحية ولا الروحية اللي إنت بتسعى ليها. إحنا فاهمين قد إيه الأكل في رمضان بيكون حلو، خصوصًا بعد يوم صيام حر وطويل، إلا إن أكل كل الأكل ده مرة واحدة عمره ما هيكون كويس لصحتك.

بننصحكم بإنكم تاكلوا كميات صغيرة على الفطار، وتكون وجبات مليانة بالعناصر الغذائية المفيدة، وبعدين تحاولوا تاكلوا وجبة تانية خفيفة بعد ميعاد صلاة التراويح؛ ده هيساعد جسمكم يتعود ويستفاد بكل إيجابيات الصيام، وده هيخليك بدل ما تحس بالتعب تحس إنك نشيط ومليان طاقة وحيوية.

حاول تتجنب إنك تفضل صاحي لوقت متأخر بتتفرج على المسلسلات أو تسهر مع أصحابك لحد الفجر. حاول دايمًا تنام كويس لإنك لو منمتش كويس ده هيأثر على نشاطك وتركيزك في اليوم اللي بعديه. النوم هيساعدك تتعامل مع الضغط النفسي والقلق، وهتقدر تبدأ يوم جديد نشيط.

رمضان هو أكتر شهر مقدس عن المسلمين في السنة، وده الوقت اللي كتير مننا بيحتاج يشحن فيه طاقته الروحية للسنة كلها ، فحاول تعود نفسك على شوية عادات كويسة يكونوا نافعين ليك طول بقية حياتك.

أخر كلمة: خليك فخور بالمشوار اللي إنت قطعته في رحلتك وخلي ده يشجعك على الخطوة اللي جاية!

تعليقات
Loading...
Tweet
Share
Share
Pin