التحرش مشكلة أزلية بنتكلم عنها تقريبًا بشكل أسبوعي. وكل حادثة مهما كانت “صغيرة” في نظر بعض الناس، فهي في الآخر جريمة تحرش تستحق إننا نتكلم عنها. لإن التحرش بكل أشكاله وأنواعه، جريمة بشعة وتجربة مريرة اللي بيتعرض لها بيحتاج وقت طويل إنه يتعافى نفسيًا منها. ومن كام يوم، للأسف ابنة نشوى مصطفى انضم اسمها لقائمة لا نهائية من أسماء الأشخاص اللي اتعرضوا للتحرش.
نشرت الفنانة نشوى مصطفى على صفحتها بفيسبوك، إن بنتها اتعرضت للتحرش من قبل لوري على الطريق، وإنهم كانوا بيزنقوا عليها بالعربية وبيقوموا بإشارات غير لائقة، لدرجة إنها كانت خايفة تعمل حادثة. تخيلوا علشان شوية شباب يرضوا نفوسهم المريضة، يعرضوا حياة شخص حرفيًا للموت.. لإن ببساطة في موقف زيّ ده كان ممكن من شدة التوتر إن البنت تتقلب بالعربية!
ومن بعد ما انتشر البوست، حصل تفاعل كبير من الناس، وبالفعل تم القبض على المتحرشين. وطمنت نشوى مصطفى الناس من خلال الفيسبوك إنها بتاخد إجراءات قانونية بخصوص الموضوع. وبعد ذهابهم للنيابة وأثناء التحقيقات، قررت نشوى مصطفى في النهاية إنها تتنازل عن المحضر.. وده اللي مافهمهوش كتير من الناس، فنزلت بوست تاني علشان توضح موقفها.
بدأت نشوى كلامها بتقديم الشكر والتقدير للدولة وكل مجهوداتها الكبيرة اللي خلت الناس أكثر قدرة حاليًا إنها تاخد حقها في المواقف اللي زيّ دي، بسبب الطرق الجديدة والكاميرات اللي في كل مكان على الطرق والملصق الإلكتروني اللي مش بس معمول علشان يرصدوا مخالفات السرعة، لكن الملصق والكاميرات كمان حماية للأفراد من أي حد ممكن يبلطج، لإن في كاميرات بتسجل كل التفاصيل، وبالتالي بقى في سرعة كبيرة في ضبط وإحضار أي مجرم.
ومن خلال نفس البوست صرحت في النهاية إنها قررت تتنازل عن المحضر وقالت “للأسف كلهم سنهم صغير، الهدف اتحقق إنهم هما وغيرهم عرفوا إن مصر اختلفت وكله متسجل وإن عندنا عينين صاحية بتحمينا وماحدش فوق القانون، يمكن آخر سطر ده يزعل بعض الناس اللي طلبوا مني استمر في القضية”.
وقالت كمان “حرصًا على أمهات وأسر المتهمين وانهيارهم بأن ولادهم يتسجنوا، أنا وابتغاء مرضاة الله تنازلت عن القضية عملاً بمبدأ العفو عند المقدرة، ربنا يهديهم. واللي طلبتوا من أهاليهم وهما بيعتذروا لبنتي إنهم يربوا عيالهم ويفهموهم معنى الرجولة، وإن أقل عقوبة للمتحرش باللفظ أو الإشارات الخادشة للحياة هي خمس سنوات طبقاً لقانون التحرش اللي أمر بتعديله سيادة الرئيس حفاظاً على حق بناتنا”.