قبل الشيف الشربيني والشيف أسامة والشيف حسن وعصر سي بي سي سفرة وقنوات الطبخ على اليوتيوب كان في “أبلة نظيرة”، كنا بنسمعها كتير في البيوت المصرية للبنات اللي داخلة على الجواز “هاتي لك كتاب أبلة نظيرة ينفعك”، وستات البيوت ماكانوش بيستغنوا عنها في عمايل أشهى الوصفات، وكانت منقذتهم في العزايم والوصفات الصعبة.. طب مين هي أبلة نظيرة، وازاي كان لها دور كبير في تعليمنا الطبخ على أصوله؟
اسمها الحقيقي هو نظيرة نيقولا، أتولدت سنة 1902، سافرت لإنجلترا علشان تكمل تعليمها في معهد معلمات الفنون في جامعة «جلوستر» ضمن بعثة بعتتها وزارة المعارف، والبعثة كان فيها 14 بنت أتعلموا فيها فنون الطهي وشغل الإبرة. وبعد ما رجعت لمصر اشتغلت كمدرسة لمادة “الثقافة النسوية” في مدرسة السنية للبنات، واللي معروفة دلوقتي باسم مادة “التدبير المنزلي”، وأتدرجت في المناصب لحد ما بقيت المفتشة العامة في وزارة التربية والتعليم.
صداقتها مع بهية عثمان
بعد فترة بعد ما رجعت من لندن، جمعتها علاقة صداقة قوية ببهية عثمان اللي كانت بتشتغل برضه في وزارة المعارف كمفتشة عامة، وفي الأربعينات أعلنت وزارة المعارف عن مسابقة لتأليف كتاب في الطهي علشان يتم اعتماده كمنهج دراسي للبنات في المدارس، وكان من الطبيعي إن نظيرة تتشجع على الخطوة دي بمساعدة صاحبتها بهية، وفعلًا ده اللي حصل وألفوا كتاب أصول الطهي؛ والكتاب غير إنه كان مادة تعليمية في المدارس، أخد طابع تجاري وأتطبع منه 12 نسخة.
بس لو بصينا هنلاقي إن نظيرة أخدت شهرة أكبر من بهية، وده بسبب إنها كانت بتظهر في فقرة ثابتة على الراديو عن الطبخ، وبعدها كتبت في مجلة حواء، ده غير إنها ألفت أكتر من كتاب بعد كده باسمها وهي في سن المعاش.
كان السبب الأساسي لكتاب أبلة نظيرة، إنه ماكنش في مراجع عربية عن مجال الطبخ وده طبعًا كان قبل السوشيال ميديا والإنترنت، فقرروا إنهم يجمعوا كل اللي أتعلموه ويكتبوا عن كل الأكلات اللي موجودة في تاريخ مصر بطريقة سهلة وسلسة لأي حد. ومش بس كده، هما كمان كانوا بيقدموا نصائح عن المطبخ عمومًا، وازاي توضبي سفرتك وازاي تعيدي استخدام بواقي الأكل.
حكايتها مع مسرحية المتزوجون
في مسرحية المتزوجون المعروفة، مش ناسيين المشهد اللي كانت بتطبخ فيه لينا “شيرين” الفرخة وقال لها سمير غانم أنتي جبتي الوصفة منين، قالت له كتاب أبلة نظيرة وقال لها دي صفحة طبخ دي، دي صفحة وفيات، وعلى لسان ابن أبلة نظيرة قال إنها زعلت أوي واتأثرت بسبب اللي اتقال في المسرحية.
دعبسة في كتاب أبلة نظيرة
هتفتح باب اللحمة، هتلاقي أصول طبخها والقواعد اللازمة لو عايز تشويها وازاي تسويها على حسب كل نوع، وازاي نحفظها في التلاجة وطريقة تنضيفها والقيمة الغذائية بتاعتها وازاي تختارها صح من عند الجزار ومايتضحكش عليك. وهتفتح باب الأرز، هتلاقي طريقة عمل كل الأنواع المسلوق والمفلفل وغيره بالخطوات، ده غير إنها هتقولك ازاي تختار غذا للمرضى أو للأطفال أو النباتيين ومانسيتش أكل الرحلات.. الكتاب مش سايب حاجة حتى الشاي وأنواعه وأصله وطرق عمله وفوائده؛ هتلاقي كل حاجة دعبس في الكتاب وبالهنا والشفا.