يعني إيه ندور في الـ calendar نلاقي في يوم مخصص للاحتفال بالبرجر؟ يعني ماشي هي تقريبًا أكتر أكلة محبوبة وعلى مستوى العالم، مش ناس كتير بتختلف عليه، وكل ما تبقى محتار تاكل إيه مع صحابك مثلًا، بترسى على البرجر اللي معظم الناس بتحبه، بس لدرجة الاحتفال بيه في يوم معين؟ واليوم ده كمان معظم محلات البرجر بتعمل فيه عروض كتير والناس بتحب تحتفل بيه بجد في دول كتير، فكرنا إيه هي قصة البرجر أصلًا وابتدت منين، وازاي اتعملت الوصفة أول مرة
شريحة لحم بقري، بين طبقتين عيش، ومع الوقت والاختراعات كترت الطبقات اللي مابينهم سواء بالجبنة أو الطماطم والخس، وأنواع تانية كتير لحد ما وصلنا دلوقتي في خمسين ألف نوع من سندوتشات البرجر، وفيه كمان برجر فراخ مش بس لحم بقري، وبقى ده السندوتش الأكثر شهرة في العالم، ظهر الاختراع في أواخر القرن 19 وأوائل القرن العشرين، وكان نتيجة الاحتياج لطبخ في وقت أقل، بطبيعة تغيير المجتمع لرتم سريع، بسبب الطبقة العاملة، فبقينا مش لاقيين وقت للوقوف ساعات لطبخ وجبة، وكمان بندور على أسهل وأسرع وجبة ممكن نلاقيها بسهولة برا البيت لو اضطرينا ناكل برا.
وعن أصله، فيه جدال ما بين أصل البرجر اللي من اسمه “هامبرجر” بيرجع لمدينة هامبورج الألمانية، وما بين إن أصله بينتمي للولايات المتحدة الأمريكية وشهرته هناك وانتشاره، اللي بيخلي ناس كتير ترجع لرواية إن أصله أمريكي.. مع تقديمه جنب البطاطس المقلية وفطيرة تفاح، بقى البرجر رمز من أشهر الأكلات في أمريكا.
والرواية الأقرب للتصديق، بتقول إن وقت زيادة الهجرة الألمانية للولايات المتحدة بعد ثورات سياسية هزت ألمانيا.. انتقل الأكل الألماني مع الشعب اللي انتقل لأمريكا، وبما إن هامبورج كانت معروفة إنها مصدر للحوم البقر عالية الجودة، بدأت المطاعم في أمريكا إنها تقدم شرائح اللحم المفروم على طريقة هامبورج. ولو مشينا ورا الرواية دي، فكده البرجر تم اختراعه على مراحل، وأصله بينقسم بين ألمانيا وأمريكا فعلًا على مدار سنين من التطورات في رحلته.
من مجرد شريحة لحم مفروم، بتتخلط مع التوابل والملح والفلفل الأسود، وتستوي بسرعة على النار، وتتعمل في أسرع سنودتش بين طبقتين عيش.. لحد الإضافات المختلفة، دي رحلة البرجر من أبسط طريقة صحية سريعة الهضم فكر فيها دكتور في نيويورك، لأكلة بيحبها مليارات في العالم كله، وكل واحد بيضيف لها حاجات مفضلة بالنسباله، من صوص لخضار أو جبنة أو حتى قطع لحوم تانية، جنب بطاطس مقلية. دي رحلة البرجر على مدار سنين.
آخر كلمة: ماتفوتوش قراءة: كتالوج الشاي: دليلك لفهم مصطلحات القهوة البلدي