الفترة اللي فاتت شهدت السينما وكمان الدراما المصرية انتعاش من نوع مختلف. بقى في مناقشات لقضايا قوية وتركيز على ملفات ماكناش بنشوفها بتتناقش في الأعمال الفنية قبل كده بالقدر الكافي. بقى في اهتمام واضح بطرح مواضيع هادفة بتخدم المجتمع وبتسلط الضوء على مختلف المواضيع اللي كان وجودها نسبيًا صغير. وأحدث ملف هيتم عرض قضيته في عمل سينمائي قريب، هو العبور جنسيًا، واللي هنشوف جميلة عوض بتجسده في فيلم المحكمة، وهنشوف كمان مواضيع تانية مهمة بيتم مناقشتها.
أحداث الفيلم هتدور كلها في يوم واحد جوا المحكمة، وهيحصل سرد لمجموعة من القصص الواقعية في مواضيع مختلفة اللي بيعيشها كتير من أفراد المجتمع. فمن خلال 6 قضايا جنائية، هيتم تسليط الضوء على مشاكل مختلفة زيّ القضايا المدنية، ومحكمة أسرة واغتصاب وميراث وعبور جنسي. مشاكل موجودة في المجتمعات العربية وبيعاني منها كتير من الناس.. وكل بطل هيناقش أحد المشاكل المطروحة في قصة العمل.
فيلم المحكمة من إخراج محمد أمين وتأليف أحمد عبد الله. وبيشارك في بطولة المسلسل مجموعة كبيرة من الفنانين زيّ جميلة عوض وغادة عادل ومايان السيد وأحمد داش وفتحي عبد الوهاب ومحمود عبد المغني ونجلاء بدر أحمد خالد صالح ومحمد مهران. وأعلن المنتج أحمد السبكى طرح الفيلم في دور العرض السينمائية يوم الأربعاء الموافق 24 نوفمبر اللي جاي.
نشرت جميلة عوض صورة لبوستر الفيلم وعلقت “خُلِقت بمشاعر أنثى في جسد رجل والمجتمع يرفض تحويلها”. وطبعًا تناول مواضيع زيّ دي بيكون شائك ومثير للجدل في بعض الأحيان، ولكن بيبقى مهم لإن دي مواضيع بالفعل بتحصل في مجتمعتنا، وأصحاب القصص الحقيقين مش بيلاقوا اللي يعبر عن مشاكلهم ويحكي قصصهم.
وكمان اختيارات أدوار من النوع ده بيتطلب جرأة وشجاعة من الممثل، نظرًا لخوف البعض من إثارة الجدل وتلقي الهجوم في حالة مناقشة المواضيع اللي البعض بيعتبرها “تابوو” أو محظورة. لكن التكتيم على بعض المشاكل وعدم تناولها، مش هيخليها تختفي. بس يمكن مناقشتها، يرفع من وعي المشاهد حولين بعض المواضيع ويصحح مفاهيم مغلوطة عنهم.