انتشر مؤخرًا خبر عن أول برنامج عربي واقعي هيتعرض على منصة Netflix بتاريخ 23 نوفمبر واسمه الأسرع. طب بيتكلم عن إيه؟ الموسم الأول من المفترض إنه يبقى مكون من 6 حلقات من المغامرات الغير مكتوبة “يعني وليدة الصدفة ومش متخطط لها”. قصص مختلفة ومبهرة عن العربيات والسواقة وإيه اللي بيحصل خلف الكواليس، ومن المفترض إن برنامج الأسرع بيتضمن ستات ورجالة من خلفيات وثقافات متنوعة من جميع أنحاء الشرق الأوسط، وهيتنافسوا وجهًا لوجه مقابل جوائز مالية.
والميزة في العمل ده إنه مفيش سيناريو فعلي الأشخاص هتمشي عليه، هو كله مبني على حاجات تلقائية بتطلع أثناء تصوير الحلقة ومش متخطط لها.
وفي كلام عن إنه طارق الحربي هيبقى واحد من المتسابقين في البرنامج، وهو يعتبر من أشهر الممثلين ومستخدمي youtube في المملكة العربية السعودية، ومن المفترض إنه يتم إذاعته في 190 دولة وبترجمة 31 لغة. نتمنى إن العمل ده يبقى مميز ومختلف ويحقق صدى عند الناس مش بس الجمهور العربي، زيّ ماشوفنا مسلسل مدرسة الروابي واللي حقق نجاح على المستوى الجماهيري لجرأته في طرح مواضيع تخص فترة المراهقة كان مسكوت في معظم الأعمال الفنية.
مستنيين نشوف البرنامج هيقدم لنا إيه ومتحمسين نتابعه ومتحمسين لأعمال أكتر من دي.