خلاص خلصنا، مافيش مذاكرة ومفيش كتب ومذكرات، الضغط والتوتر راح، وبدأت أجازة نص السنة أخيرًا! مبروك! هتستغل الأجازة إزاي؟ ماتخافش مش هقولك تبقى فرويد زمانك وتتعلم تلات لغات وتفتح شركة صغيرة وتجهز دراسات عليا لرسالة الدكتوراة، دي أجازة، يعني هنستريح ونسترخي ونتنح بس.
نتنح في مسلسلات وأفلام
طالما فاضيين ومش ورانا حاجة يبقى نتنح، سهلة ومش مستاهلة، وإيه أحلى من إنك تتنح في مسلسل سبع أجزاء أكشن أو فانتازيا أو رعب، أو أحلى من كل ده، مسلسل كوميدي تافه، مش عايز أفكار وجمدان، عايز أتفرج وأنا متنح وأنبسط.
لو بتحب الرعب والزومبي، ممكن تشوف مسلسل (The walking dead) أو مسلسل (The last of us) اللي نزل منه تلات حلقات لحد دلوقتي وجامدة. ولو بتحب الكوميدي ممكن تشوف (The big bang theory)، أو (Friends)، لو ماكنتش شفته، الحق شوفها علشان كل الناس تقريبًا بتحبها.
ولو عايز تتفرج على حاجة عربي كوميدي حلوة، عندك مسلسل اللعبة والوصية والبيت بيتي وموضوع عائلي. وتقدر برضه تدخل على نيتفليكس وتشوف إيه الأفلام العربي اللي موجودة، واللي أغلبها حلوة أوي.
ما تيجي نقعد مع بابا وماما!
المذاكرة والدح بيخلينا نقصر في علاقتنا مع الناس اللي حوالينا، وأكيد كطالب مصري تقليدي بتسمع من باباك ومامتك إنك مش بتقعد معاهم وطول الوقت بتذاكر -إذا كنت بتذاكر يعني- أو في الشارع مع صحابك.
والحقيقة يعني أغلنا مقصرين أوي في العلاقة مع أهلنا، وعلشان كده ممكن نستغل الأجازة إننا نقعد شوية معاهم. ممكن بالليل كده في يوم تعمل فشار وتجيب فيلم عائلي وتقعد تتفرج عليه معاهم، أو حتى تقعد ترغي وتستعيد ذكريات طفولتك وتسمع حكاياتهم، صدقني هتنبسط أوي وهما كمان هينبسطوا.
هنضف أوضتي وأرتب الدولاب
من غير كسوف، نقدر نقول إن في احتمال كبير جدًا إن أوضتك مش نضيفة (دي الكلمة المؤدبة لوصف الموضوع)، ودولابك مقلوب وكل شراب في ناحية، ودي حاجة موترة جدًا، علشان كده ممكن ناخد يوم أو يومين كده ننضف الأوضة ونرتب الدولاب.
التنضيف والترتيب عمل روتيني بيحتاج مجهود بدني لكن مش بيحتاج تركيز، ولو عملته وأنت بتسمع مزيكا بتحبها هتستمتع بساعات من الروقان والدماغ الفاضية، ويمكن كمان تفكر لك في فكيرة وتعمل الشركة اللي نفسك فيها وتضرب معاك وتبقى ولا نجيب ساويرس.
نقرا كتب وروايات
يعني لو ماعندكش مانع وبتحب تقرا، أنصحك تنزل معرض الكتاب اليومين دول وتشتري لك كام رواية حلوين وتقرا واحدة ولا اتنين منهم، القراية للي بيحبها بتبقى أحلى وقت بيقضوه، ولو كانت رواية خفيفة ولذيذة هتساعدك تفضي دماغك وترتاح من التركيز والتفكير.
لو عايز نصايح في القراية، ممكن تقرا يوتوبيا للدكتور أحمد خالد توفيق، أو تستعيد ذكريات الطفولة مع رجل المستحيل لدكتور نبيل فاروق، أو روايات المغامرون الخمسة، وعيش بقى في المغامرات اللذيذة.
نقابل صحابنا اللي مشفناهمش من قرن!
عندك كام صاحب ماشفتوش من سنين؟ بتتكلموا على السوشيال ميديا وبتتفقوا تتقابلوا وكل واحد يقول قشطة، تمام، هأكد عليك يا صاحبي، وفي الآخر مابتتقابلوش؟ أنا شخصيًا معظم صحابي كده.
فـ ليه بقى مانستغلش الأجازة وننزل نقابل صحابنا دول؟ نقعد معاهم في كافيه أو ننزل ناكل في مطعم بنحبه، أو نتمشى ونجيب إزازتين بيبيسي ونسبوت على عربية عم محمد على أول الشارع ونتجاذب أطراف الحديث كالأيام الخوالي!
أخيرًا: مش لازم تكون هي دي الحاجات اللي تختار منها في أجازتك، في حاجات كتير ممكن تعملها علشان تفضي دماغك وتروق على نفسك، وتتخلص من ضغط المذاكرة والامتحانات، بس أهم حاجة، انبسط وتنح على قد ما تقدر.