نظم طلاب الجامعة الأمريكية في القاهرة، وقفة احتجاجية ضد زيادة المصروفات الدراسية في الجامعة من 370 ألف لـ 730 ألف جنيه في السنة الواحدة، ورفع الطلاب لافتات بتقول: “لا لتسليع التعليم”.
ظهر الطلاب في بعض الفيديوهات المنتشرة على منصات التواصل الاجتماعي، وهما بيهتفوا: “اوعوا تقولوا دي ملاليم احنا بندفع بالملايين” و”ياللي ساكت، ساكت ليه، أبوك حرامي ولا إيه؟”.
مصروفات الجامعة الأمريكية في القاهرة مازادتش فعلًا، لكن لإن المصروفات بتدفع بالعملة الأمريكية (الدولار) من سنين، ومع ارتفاع سعر الدولار أمام الجنيه المصري، زاد المبلغ اللي الأهالي بيدفعوه لشراء الدولار علشان يسددوا المصروفات الجامعية للضعف.
قالت رحاب سعد الدمياطي، المتحدث الإعلامي باسم الجامعة الأمريكية في القاهرة، إن الطلاب بلغوا إدارة الجامعة بالمظاهرات اللي هينظموها تحت سياسة الجامعة لحرية الرأي.
ولما لاحظت الجامعة إن بعض الطلاب ماعندهمش القدرة على دفع المصاريف الدراسية نتيجة الزيادة الكبيرة في سعر الدولار، قررت الجامعة دفع جزء من المصروفات لعدد من الطلاب، وقررت تخفض المصروفات بنسبة 10% للطلاب اللي هيدفعوا المصروفات الدراسية قبل 9 فبارير 2023.