محاولات انتحار واختفاء قسرًا وعمل بالسخرة واغتصاب مقابل الأكل والشرب.. ده حال المهاجرين والمهاجرات في ليبيا، تقرير أممي كشفه محققين تابعين للأمم المتحدة، حسب وكالة الصحافة الفرنسية، بيقول إن المهاجرين المحتجزين في ليبيا بيعانوا من انتهاكات قتل وتعذيب واسترقاق، وبالأخص السيدات، فالتقارير بتقول إنهم اتعرضوا للاغتصاب مقابل إنهم ياكلوا ويشربوا.
وده بعد ما قامت البعثة الدولية المستقلة لتقصي الحقائق في ليبيا بأكتر من زيارة ميدانية وكشفت من خلالها إنهم أتعرضوا لأعمال عنف جنسية من قبل المسئولين عن تهريبهم، وفي الغالب السبب الأساسي ورا ده هو ابتزاز عيلتهم علشان يبعتوا فلوس. والتقرير أثبت إن العنف الجنسي وصل لحد إن البنات والستات بقوا يحطوا “لولب” في الرحم قبل ما يروحوا ليبيا علشان يتفادوا أي حمل غير مرغوب فيه بسبب أعمال العنف دي.
الموضوع ده مش وليد النهارده ولا اكتشفوه بالتقرير اللي اتتنشر في الأيام اللي فاتت، سنين وبيعاني المهاجرين من أعمال عنف، وده وفقًا لروايات وشهود عيان.
قصص وشهادات مخيفة
وفق تقرير اتنشر في صحيفة “دير شبيغل” الألمانية في 2021، أتكلم عن مهاجرة من مالي، قدرت إنها توصل لأوروبا وحكت ازاي تم اغتصابها على إيد المليشيات المسؤولة عن معسكرات احتجاز اللاجئين.
وقالت إنها كانت محتجزة مع 170 ست في مكان رديء التهوية ومن غير فراش نذضف، أما الأكل فكان بيتقدم مرة واحدة في اليوم مع عبوات عصير بيحط فيها أفراد الميليشيات أدوية لإخضاع الستات للاغتصاب من غير مقاومة، وقالت إن الستات كانت بتخلف بعد اللي بيحصل معاها والنتيجة مابتبقاش عارفة مين الأب.
وفي وقت سابق نشرت “دير شبيغل” تقرير في 2019 عن شهادات من مهاجرين وصلوا إلى أوروبا وبيقولوا إنهم أتعرضوا للابتزاز علشان يقدموا فدية لإطلاق سراح أقاربهم المحتجزين في المعسكرات، والمجلة وصفت ده بإنه تجارة ابتزاز ضخمة.
مهاجر روى شهادته قبل ما يغرق
شهادة مهاجر رواها قبل ما يغرق قرب شواطيء ليبيا وقال إنه أتعرض للضرب بالسكاكيين على إيد ميليشات طرابلس، وبعدها أعلنوا عن حادثة غرق زورق كامل بالمهاجريين كان فيه سيلمان، وهو شاب غيني حاول إنه يهرب أربع مرات من الموت في سجون ميلشيات الغرب الليبي لمدة 3 سنين، بس بعد ما هرب منه في ليبيا لاقاه في البحر.
وفي تكملة لشهادته، قال سليمان إنه كان بيتألم بعد تعرضه لاعتداء من قبل المسلحين، وأكد إن عناصر من مليشيات طرابلس طلبوا منه إنه ييجي علشان ينظف بيوتهم، بس اكتشف إنها كانت كدبة، واتفاجيء بيهم وهما بيضربوه بالسكاكين.