في قضية درامية غريبة تشبه مسلسلات وأفلام السرقات والتهريبات الكبرى زيّ المسلسل المشهور “Money Heist”، قدرت الحكومة الإسبانية تضبط تلات غواصات بتشتغل بشكل أوتوماتيكي ومن غير سواق، وبتنقل كميات كبيرة من المخدرات تحت المياه، من المغرب لإسبانيا، وده بحسب تقرير نشره موقع “مونت كارلو“.
تم القبض على تمانية أشخاص في العمليات اللي نفذتها الشرطة الإسبانية في برشلونة وإقليمي ملقة وقادس في جنوب إسبانيا، ووضح بيان الشرطة إن دي المرة الأولى اللي تصادر فيها أجهزة زيّ دي.
وضحت الشرطة إنها تعتقد إن العصابة صممت الغواصات المسيرة دي بحيث تكون “قادرة على تحمل حمولات كبيرة” علشان تستخدمها منظمات إجرامية تانية، وأضاف البيان إن “الأجهزة دي تقدر تنقل كميات كبيرة من المخدرات عن بعد من خلال مضيق جبل طارق، وكل غواصة مزودة بحوالي 12 موتور، ومداها ممكن يوصل لـ 30 كيلومتر.
خصائص الغواصات دي بتسمح للعصابة وبسهولة إنها تدير عمليات عبور تحت المياه لمضيق جبل طارق اللي بيفصل بين إسبانيا والمغرب، وامتداده 15 كيلومتر بس، ووضح البيان إن العصابة كانت ناوية تسلم تلات غواصات لعصابة مخدرات فرنسية علشان تنقل كميات كبيرة من الكوكايين.
يعتبر المغرب أكبر منتج لمخدر الحشيش في العالم، وبيتم زرعه بشكل غير قانوني، وبيشتغل المهربين على نقله إلى أوروبا بشكل أساسي.