انتشرت امبارح على السوشيال ميديا صورة من عرض في السيرك، بيظهر فيها الأسد في العرض نايم من كتر التعب، الناس تداولت الصورة بشكل واسع وعبروا عن رأيهم اللي بيوضح إن الشكل اللي ظهر بيه الأسد ضد حقوق الحيوان ومايرضيش حد.. وفعلًا الأسد شكله صعب وباين عليه الإرهاق وقلة الأكل، وناس كتير طالبت بوقف عروض السيرك اللي بتعتمد على الحيوانات، لإنها بتضمن اعتداء على الحيوانات وتعذيبهم. ولحماية الحيوانات من الاستغلال التجاري.
هل علشان نحقق نوع من الترفيه، ده بيدينا الحق إننا نعذب حيوان ونمنع عنه الأكل ونجهده في عروض كتير تخليه في النهاية يظهر بالشكل المؤسف ده؟ هل في الأساس ده ترفيه إني أروح أتفرج على حيوان بيتعذب علشان يقوم بعمل حركات مختلفة مفروض إنها تضحكنا؟
ناس كتير طالبت بوقف ومنع عروض السيرك اللي فيها حيوانات، لإن بالفعل بلاد كتير ابتدت في تطبيق المنع ده زيّ ألمانيا، لعدم تعريض الحيوانات للتعذيب بكل أشكاله، من أول الضرب في محاولات الترويض والتدريب، لاستعمال مواد مخدرة للحيوانات خصوصًا الأسود والحيوانات المفترسة، علشان يقدروا يتحكموا فيهم، وكمان الإجهاد اللي بيتعرضوا له الحيوانات في كثرة العروض اللي بيقدموها.
للأسف الصورة دي مش ميم مضحك، لما الناس اتدخلت وقالت إن تعذيب الحيوانات مش مادة للسخرية ومش حاجة تضحك، لكن اتقال إن اللي مكتوب على الصورة ده مش تريقة، وإن الأسد فعلًا قام بعروض كتير مختلفة ورا بعض من غير راحة، وده اللي أدى إنه يظهر بالتعب والإرهاق اللي في الصورة.