مشروبات الشتا: أنواع مختلفة للشاي غير اللي متعودين عليه

“خربوش الشاي” اللي متعودين عليه والناس كلها بتقدر قيمته دلوقتي، واللي بنشربه كمصريين في كل الأوقات والحالات، الشاي اللي احنا عارفينه مش هو النوع الوحيد للشاي، بس هو أشهرهم خصوصًا عند المصريين، لكن علشان الشتا يحب المشروبات الدافية، وعلشان كمان احنا بنزهق، حبينا نعرف أنواع تانية للشاي غير اللي احنا عارفينه، علشان ننوع في مشروبات الشتا ونتدفى من غير زهق، ده غير كمان فوايده المختلفة للجسم، وخصوصًا مساعدته في علاج نزلات البرد.

شاي الكركم

عن: web teb

بخصائص مضادة للالتهابات ومضادة للبكتيريا وكمان الميكروبات، شاي الكركم بفوائده الطبيعية مش بس هيدفيك في البرد، كمان هيساعدك تتخلص من نزلات البرد وتوابعها.

وتقدر تعمله بطريقة سهلة باستخدام جذور الكركم الطازجة أو مسحوق الكركم، أو إنك تجيب شاي الكركم جاهز من أي سوبرماركت زي الشاي العادي، وممكن حسب تفضيلاتك تزود عليه ليمون أو عسل أو زنجبيل.

الكركم مفيد للجسم، لكن احنا مش بنديله أهمية في أكلنا وشربنا، ولو حطينا معلقة مثلًا على الأكل كل فين وفين بيبقى هو ده استخدامنا له، رغم كل الفوائد الصحية له، علشان كده شاي الكركم يعتبر فرصة كويسة علشان نستفيد بالقيمة الغذائية دي.

شاي البابونج

النوع ده من الشاي معروف إنه بيساعد على تهدئة الأعصاب في وقت التوتر والقلق، وكمان بيعزز المناعة وده احنا في أشد الحاجة له حاليًا، وكمان بيهدئ أعراض البرد وبيساعد على الوقاية منه.

لو نومك مش منتظم، شاي البابونج بالنسبة لك مش هيكون مجرد مشروب طعمه حلو، لكن هيساعدك على تنظيم نومك، وكمان مفيد للمناعة وتقليل التوتر.

ده غير إن شاي البابونج طعمه زهري لطيف، علشان كده هيكون مشروب مثالي للشتاء والمشاكل اللي بنواجهها فيه، وهيكون ركن لطيف بنلجأ له في آخر اليوم.

شاي الكركديه

عن: mozaliza

في أسطورة متوارثة ومتعارف عليها بيننا، لما يبقى حد متعصب أو متضايق نقول له روق واشرب كركديه، وكمان أي حد ضغطه عالي بنقترح عليه نفس الاقتراح، الكركديه واخد شهرة بإنه بيهدي الأعصاب، ده غير طعمه الحلو وكمان مضادات الأكسدة اللي بيحتوي عليها.

حبينا نعمل ميكس بين اتنين من أهم المشروبات المفضلة عند المصريين، علشان يعتمدوا عليه في الشتاء.. لازم تجرب شاي الكركديه.

الشاي الأخضر

ده بقى بطل الدايت والحياة الصحية والناس اللي واخدة بالها من صحتها وأكلها وشربها، لكن الناس حاصراه في دور المُنقذ من الكوارث اللي بنعملها، فاحنا متخيلينه بطل خارق هيحرق كل السعرات الحرارية بعد جريمة أكل.

الشاي الأخضر عمومًا له فوائد أكتر من كده، لإنه غني بمضادات الأكسدة اللي بتساعد في تقليل مخاطر الإصابة بالإنفلونزا ونزلات البرد، اللي معظم الناس دايمًا مصابة بها طول فصل الشتاء، وده بيخلينا نحط الشاي الأخضر في القائمة المثالية لمشروبات الشتاء بعيدًا عن مشروبات الشتاء الدسمة.

شاي الزنجبيل

عن: web teb

الزنجبيل معروف بقيمته الغذائية وفوائده، خصوصًا لنزلات البرد والإنفلونزا اللي مافيش أكتر منها في الشتاء، لكن طعمه مش محبب لناس كتير، فممكن دمج الزنجبيل مع الشاي يبقى مقبول بالنسبة لهم، ودي حلول علشان يستفيدوا من مميزاته زي فائدته للمعدة، وإنه بينظم عملية الهضم، غير إنه بيحتوي على مضادات للبكتيريا.

مفهومك عن خربوش الشاي بعد المقال ده هيكون أوسع وأشمل بطرق ووصفات جديدة، وده اللي يستحقه الشاي بالمكانة المهمة له في حياتنا.

آخر كلمة: ماتفوتوش قراءة: مشروبات بتبقى هي ملجأنا الوحيد في فصل الشتا

تعليقات
Loading...