بعد كل اللي انتشر عن القانون الجديد لتسجيل الشقق في الشهر العقاري، انتشرت إشاعات كتير عن المبالغ اللي هتكون رسوم للتسجيل في الشهر العقاري، والناس اتضايقت وشافت إن ده مش عادل، لكن الموضوع تم توضيحه، والتعديل الجديد لقانون الشهر العقاري ده هيبدأ تطبيقه رسميًا في 6 مارس الحالي، وبتهدف من خلاله وزارة العدل لتبسيط إجراءات التسجيل العقاري الرسمية وتشجيع المواطنين على إثبات الملكية العقارية، بعد تصريح رئيس الوزراء إن 95% من العقارات غير مسجلة، وهيكون فيه نوعين من إشهار الملكية، إما بالرضا أو بالقضاء.
وانتشرت على السوشيال الميديا معلومات غلط وأسعار مبالغة جدًا لرسوم التسجيل، وإن رسوم تسجيل الشقق في الشهر العقاري بنسبة 2.5% ضريبة عقارية ونسبة 1% رسوم نقابة محامين في حالة التسجيل الرضائي، بالإضافة لرسوم التسجيل القضائي في حالة التسجيل القضائي، والمعلومات الغلط دي كمان قالت إن الرسوم في الحالة دي هتوصل لتسجيل شقة مساحتها 100 متر سعرها السوقي 400 ألف، الرسوم هتوصل لـ 38 ألف جنيه، لكن كل ده غلط وتم الإعلان رسميًا عن الأسعار الحقيقية لكل مساحة على حسب، وده هيكون:
– الشقة مساحة 100 متر رسوم تسجيلها هتكون 500 جنيه فقط شاملة رسم المساحة 125 جنيه.
– الشقة مساحة 200 متر رسوم تسجيلها 1000 جنيه شاملة رسم المساحة بـ 175 جنيه للوحدة.
– الشقة الـ 300 متر رسوم تسجيلها 1500 جنيه شاملة رسم مساحة بـ 225 جنيه.
– الشقة اللي مساحتها تزيد عن 300 متر رسوم تسجيلها 2000 جنيه، شاملة رسم تسجيلها 275 جنيه.
وفي حالة عدم التسجيل، مش هيتمكن المشتري من نقل عدادات الكهرباء والمياه والغاز والاتصالات للعقار الجديد، وبكده هيبقى العقد الابتدائي وحكم صحة التوقيع عليه قدام الجهات الحكومية كأنه مش موجود، إلا بعد تسجيله في الشهر العقاري.