بالرغم من الظروف الصعبة اللي بتمر بيها البلاد العربية والعالم كله بسبب فيروس كورونا، إلا إن السباق الرمضاني السنة دي مش هيكون أقل أبدًا من أي سنة فاتت، بالعكس! فإحنا شوفنا وسمعنا عن أعمال قوية كتير منتظرين نشوفها في سباق رمضان اللي جاي، وبعد ما تم طرح كتير من البوسترات الرسمية للمسلسلات، حبينا نعملكم دليل جمعنالكم فيه مجموعة من المسلسلات اللي هتشارك في رمضان والنجوم الكبار اللي هيتواجدوا واللي متوقعلهم نجاح كبير ومتحمسين نشوف أعمالهم الدرامية من دلوقتي!
يحيى الفخراني – نجيب زاهي زركش
السنتين اللي فاتوا، غاب الفنان القدير يحيى الفخراني عن السباق الرمضاني، فكان آخر مسلسل شارك بيه “بالحجم العائلي” سنة 2018، وده لإنه كان منشغل بمسرحيته الكبيرة الملك لير.. فبعد ما افتقدنا العملاق يحيى الفخراني لمدة سنتين، فإحنا مش متوقعين حاجة غير عودة ضخمة تليق بيه وبقيمته الفنية! بيشاركوه البطولة في المسلسل الفنانة أنوشكا، والفنانة هالة فاخر ورامز أمير وغيرهم من الفنانين.
منى زكي – تقاطع طرق
آخر مرة شوفنا منى زكي في عمل رمضاني كان مسلسل أفراح القبة سنة 2016! وبالرغم من إننا شوفناها كضيفة شرف في رمضان اللي فات في مسلسل “ونحب تاني ليه”، إلا إننا وحشنا نشوفها في عمل خاص بيها.. فهتشارك منى السنة دي بمسلسل تقاطع طرق وهيشاركها في البطولة محمد ممدوح ومحمد فراج.
أحمد السقا – نسل الأغراب
الفنان أمير كرارة مغابش عن الماراثون الدرامي السنة اللي فاتت، فشوفناه في المسلسل اللي عمل ضجة وقت عرضه “الاختيار”، السقا كمان ظهر كضيف شرف في نفس المسلسل، إلا إنه ماعملش عمل مطلق السنة اللي فاتت. علشان كده عودته السنة دي وبمسلسل بيشاركه البطولة فيه أمير كرارة أكيد هيكون عمل يستحق المشاهدة.
عمرو يوسف – الملك
بعد غياب الفنان عمرو يوسف لفترة من بعد آخر مسلسل قدمه سنة 2018 “طايع”، هيرجع عمرو من جديد بمسلسل الملك اللي هيقدم فيه شخصية الملك أحمس ومسيرته في تحرير مصر وطرد الهكسوس. المسلسل هيكون من إخراج حسين المنباوي وبيشاركه في البطولة أمير صلاح الدين وسوسن بدر.
روبي – شقة 6
آخر مرة شوفنا روبي في الماراثون الرمضاني كان من خلال مسلسل “أهو ده اللي صار” سنة 2019، ولإنها أبهرت الكل فيه، فإحنا متحمسين نشوفها تاني من خلال مسلسل شقة 6 واللي هيشاركها البطولة فيه مجموعة كبيرة من النجوم زيّ شريف سلامة وأحمد حاتم وصلاح عبدالله.
مصطفى شعبان – عش الدبابير
مصطفى شعبان غاب عن الماراثون الرمضاني السنة اللي فاتت.. فشوفناه آخر مرة في رمضان سنة 2019 في مسلسل أبو جبل.. أما السنة دي، فمصطفى شعبان راجع بقوة من خلال مسلسل عش الدبابير اللي هيشاركه فيه البطولة الفنان عمرو سعد والفنانة رانيا يوسف والفنانة ياسمين رئيس.. فريق العمل لوحده مخلينا متحمسين من دلوقتي!
مصطفى قمر – فارس بلا جواز
هتصدقونا لو قولنالكم إننا آخر مرة شوفنا مصطفى قمر في بطولة مسلسل عمومًا كان سنة 2010؟ منتهى العشق كان آخر مسلسل يقوم بيه مصطفى قمر، وظهر بعدها كضيف شرف فقط في مسلسلين. فبعد 11 سنة من الغياب، مصطفى قمر قرر إنه ينافس في الماراثون الدرامي من خلال مسلسل فارس بلا جواز اللي من تأليف فداء الشندويلي ومن إخراج معتز حسام، وهيشارك نجوم كبار كضيوف شرف في بعض الحلقات منهم شيري عادل وبشرى وديمة بياعة.
هاني سلامة – بين السما والأرض
بعد ما شوفنا هاني سلامة آخر مرة في رمضان سنة 2019 من خلال مسلسل قمر هادي، هنرجع نشوفه في مسلسل جديد ليه بينافس في رمضان. “بين السما والأرض” من بطولة هاني سلامة ودرة و سوسن بدر ويسرا اللوزي.
دنيا سمير غانم – المدينة
آخر ظهور لدنيا بمسلسل في رمضان كان من سنتين في مسلسل “بدل الحدوتة تلاتة”، وهنرجع نشوف دنيا من تاني في السباق الرمضاني السنة دي من خلال مسلسل المدينة، من تأليف وإخراج هشام جمال وهيشاركها البطولة عمرو وهبة وشيماء سيف ووالدتها الفنانة دلال عبدالعزيز.
حمادة هلال – المداح
شارك حمادة هلال في السباق الرمضاني سنة 2019 بمسلسل “ابن اصول”، وبعد سنتين من الغياب عن الماراثون الرمضاني، هيرجع حمادة هلال من تاني من خلال تقديمه لمسلسل المداح اللي بتشاركه فيه البطولة نسرين طافش وخالد سرحان.