منظمة الأمم المتحدة للتربية والثقافة (يونسكو) ضمت الخط العربي لقائمة التراث الثقافي غير المادي للبشرية، بعد ما تم تقديم الملف من مصر و15 دولة عربية تانية منهم السعودية والكويت والإمارات في سنة 2020، وعلشان كده، تم اعتباره ملف مميز لإن تم تقديمه من أكبر عدد من الدول في نفس الوقت، ودي خطوة هتساهم في تعزيز التراث الثقافي غير المادي، وبشكل خاص فنون الخط. علشان كده، فكرنا نجمع أنواع الخط العربي ونعرّف الناس بيه أكتر، لإن المعروف منه نوع أو اتنين بس.
خط النسخ
أشهر وأبسط أنواع الخط العربي، وبيكتب بيه العدد الأكبر من الناس في الوطن العربي لسهولته، وتم تسميته “النسخ” لكثرة تداوله في الكتابة، وبيتميز بوضوح الحروف وكبرها، وبيضمن القراءة بشكل صحيح بنسبة كبيرة.
خط الرقعة
بتنسب تسميته للرقاع، اللي هو جلد الغزال، النوع ده من الخط بيضيف شكل مميز ومهيب للكلمات، وبيستخدم يوميًا ومن أكتر الأنواع الشائعة للخط العربي.
الخط الفارسي
أو خط التعليق، النوع ده من الخط العربي ظهر في بلاد فارس (إيران) وبيتميز الخط الفارسي أو خط التعليق بإن خطوطه مش مستقيمة، فكل الحروف فيها انحناءات أو قيم متغيرة في سمك أجزاء الحرف الواحد.
الخط الديواني
الخط الديواني ابتكره العثمانيين، وتم اعتماده كخط رسمي للدولة العثمانية بعد فتح القسطنطينية، واتسمى بـ “الديواني” نسبة لدواوين الحكومة اللي كان بيتكتب فيها.
الخط الكوفي
بيعتبر الخط الكوفي أفضل أنواع الخطوط العربية للفن والزخرفة، وبيعتمد رسمه على قواعد هندسية، ووحدات زخرفية. واشتهر في العصر العباسي وظهرت زخارفه على المآذن والمساجد والمدارس.
خط الثلث
استخدم خط الثلث في تزيين الجوامع والمحاريب والقباب وبدايات المصاحف، كمان تم استخدامه في عناوين الكتب، وأسماء الصحف والمجلات.
الخط الحر
الخط الحر خط حديث مش بيخضع لقواعد محددة، لكنه بيخضع لذوق ورؤية كل خطاط.