كلنا بيجيلنا شعور بالملل في فترة من الفترات، بس في اللي بيعرف يتعامل معاه صح، وفي اللي بيتمكن منه ويسيطر عليه ويحوله بالتدريج لنوع من أنواع الاكتئاب. علماء النفس اتكلموا عن النوع ده من الملل وقالوا إنه زيّ سوس الخشب اللي بياكل أي حاجة من جوا وبيخليها مخوخة، وبيسيب في الأخر فراغ داخلي، ونوع من الخواء السلبي مش بتبقى عارف جاي منين.
الملل في تعريفه العلمي، هو عبارة عن وضع نفسي غير مريح ومزعج وجاي من نتيجة عدم استقرار نفسي داخلي.. طب ازاي ممكن نتعامل معاه ونمنعه إنه يسيطر على حياتنا ويودينا للاكتئاب؟
اتعلم مهارات جديدة
ممكن نحارب الملل بإننا نتعلم حاجات جديدة تملى وقت فراغنا، زيّ مهارة مثلًا. ودلوقتي إنك تطور من نفسك بقى أسهل مما يكون في وسط توافر كل الإمكانيات اللي بتساعد، أو لو عندنا هواية معينة، ممكن نرجع نهتم بيها من تاني وننميها وهتكون سلاحك ضد الملل.
حافظ على حياتك الإجتماعية
الحياة الاجتماعية بتعمل توازن نفسي مع الشغل وأي حاجة تانية، هي مساحة نفسية قادرة إنها تقدملك الدعم وقت لما تحتاجه ولما تحس إن في فراغ داخلي جواك، وفكرة إنك تتعرف على ناس جديدة وثقافات مختلفة ده هيفيدك كمان على المستوى الشخصي.
ابدأ يومك بحاجة مختلفة
حاجة جديدة ومختلفة ممكن تعملها وتحسسك بالانبساط حتى لو كانت بسيطة، وفي نفس الوقت هتقتل روتين التفكير اليومي عندك، واللي بيحسسك إنك ماعندكش غير مساحة ضيقة ومحدودة في دماغك.
انزل اتطوع في أي مكان
غالبًا الملل بيجي بسبب إننا بنعمل كل يوم نفس الحاجة وبنروح نفس الأماكن، لكن لو حاولنا ندخل أماكن جديدة في حياتنا زيّ إنك كل فترة تروح تتطوع في مكان مختلف، غير إن أهميته في إنه هيكسر الملل اللي عندك، لأ ده هيملى كمان عندك حتة فراغ نفسي بتبقى موجودة عند أي حد وهو “احنا بنعمل حاجة حلوة في حياتنا ولا لأ؟”، ولو ماعرفتش تملاها بشكل الصح، الملل هيسيطر عليك ومن بعده الاكتئاب.
جدد في شكلك أو بيتك
ممكن تعمل تغيير في ديكور بيتك حتى لو هتغير تفاصيل صغيرة وهتكون بأقل الإمكانيات، ممكن حتى تجيب عصافير أو أي حيوان في البيت، هيغير من موود وروح البيت. ونفس الكلام على شكلك، في ناس بتنبسط لو غيرت في قصة شعرها مثلًا أو في طريقة لبسها.
اكتب وعبّر عن مشاعرك
كل لما تحس إنك مخنوق وزهقان وماعندكش طاقة إنك تواجه الحياة، اكتب كل مشاعرك السلبية دي على الورق، ساعدها إنها تخرج، لإن كتمها هيأثر على النفسية والحالة المزاجية على مدى مش هيكون بعيد.