إيه الأوقات المعينة في السنة اللي بتنتهي فيها علاقات كتير.. وازاي تقدر تتخطى ده؟
بواسطة: ساره علي
مفيش وقت محدد للإنفصال, كل علاقة ليها أسبابها ومراحل بتعدي بيها. بس في الأوقات المعينة اللي في السنة اللي بتلاحظ إن أغلب العلاقات بتنتهي فيها. وحسب دراسات معتمدة على تحليل بيانات الفيس بوك لإتنين من الصحفيين في لندن سنة 2008، (David Mccandless, Lee Byron) اللي توصلوا إن أكتر وقت بيحصل فيه انفصالات في السنة هو يوم الڤلانتين, وقبل الكريسماس بأسبوعين.
يعني ليالي الشتاء مش رومانسية زيّ ما احنا متوقعين؟!
دي كانت تغريدات الناس على تويتر في شهر ديسمبر
متخافش أنت مش لوحدك اللي بتمر بانفصال في الأوقات دي, وإحساسك إن في علاقات بتنتهي كتير في الشهر ده صح..
شهر ديسمبر وأسبوع الكريسماس
سنة جديدة دايمًا فرصة لبداية جديدة. الإنسان بيبدأ يشوف إيه اللي حصل في نهاية السنة، وبيحاول إنه يعدل من أخطائه ويحقق أهدافه ويتخلص من المشاكل.
الفكرة نفسها بتشكل ضغط على الإنسان بشكل عام وبيحس إنه لازم يكون سعيد في الأوقات دي مع بداية السنة. وده بيأثر على العلاقة الموجودة في حياته, ولو الشخص مش متأكد من حبه. فبيعيد النظر تاني إذا كان عاوز يكمل مع نفس الشخص, وهل يستحق يدخل معاه سنة جديدة؟
ده مش مبرر للإنفصال ولكن أحيانًا الضغط ده بيأثر على العلاقة. العلاقات بتحتاج مجهود, وتقبل وتمسك وحب من الطرفين وخصوصًا بعد مرحلة الإنبهار.
يوم الڤلانتين
طبعًا يوم الڤلانتين معروف إنه يوم للحب والهدايا وبس, بس الحقيقة عكس كده خالص، اليوم ده بيخليك ترجع تقيم العلاقة تاني. ولو العلاقة أصلًا على وشك الإنهيار، فأنت ممكن تقلق. من أكتر الأيام اللي بيحصل فيها إنفصالات يوم الڤلانتين فبسبب ضغط اليوم ده بترجع تفكر في شكل العلاقة من تاني.
عيد الحب مش مجرد هدايا, ولكن ازاي بطريقتك هتعرف تبين للشخص معاك إنك بتقدره وبتحبه. وده كمان بينطبق مش بس على عيد الحب ولكن المناسبات اللي بتتعلق دايمًا بالعلاقات زيّ عيد الجواز. فكرة وجود يوم للتفكير تاني في العلاقة بيجبرك تسأل أسئلة لنفسك, وعلى حسب الإجابات بتكون النتيجة.
ازاي ترجع لحياتك تاني بعد إنتهاء العلاقة؟
مش من السهل إنك تتقبل إن العلاقة انتهت، وكمان وقت الإنفصال يعتبر من اللحظات الصعبة اللي هتمر بيها في حياتك. بس في حاجات تساعدك علشان تعدي الفترة دي.
ماتتهربش من مشاعرك وعبر عنها
عيط براحتك، طبيعي جدًا إن مشاعرك في الوقت ده تكون متلغبطة وكمان طبيعي إنك تكون لسه بتحب الشخص اللي انفصلت عنه. هتمر بمشاعر كتير زيّ الحزن والخوف والغضب. ماتحاولش إنك تتجاهل مشاعرك، بالعكس تقبل فكرة إنك حزين وخليك عارف دايمًا إن ده مجرد وقت وهيعدي. ماتتكسفش تعبر عن مشاعرك مع صحابك وأهلك، ده هيساعدك إنك تتحسن.
حاول تعمل حاجه تساعدك كل يوم
ماتستناش مزاجك يكون كويس ممكن تقرا أو تتمرن أو تكتب عن اللي بتمر بيه، أو تجرب حاجة جديدة أو حتى ترجع تعمل حاجة بتحبها. كمان ممكن تتفرج على فيديوهات إيجابية. حاول كل يوم تساعد نفسك ولو بحاجة صغيرة. وابعد عن فكرة المراقبة تمامًا.
اشغل نفسك وماتقعدش لوحدك كتير
حاول ماتتهربش من أي مسئوليات وخليك دايمًا مشغول. ممكن تخرج مع صحابك، اتفرج على التلفزيون, ممكن تنزل تتكلم مع حد بتثق فيه وتحكيله كل مشاعرك بصراحة. أكيد هتحتاج تقعد لوحدك بس بلاش تعزل نفسك.
ماتدورش على بديل
وعلشان ده بيحصل بشكل غير واعي (خلي بالك) أنت هنا بس بتدخل حد في حياتك علشان يملى فراغ الشخص التاني, وده بيحسسك بتحسن لفترة قصيرة بس مش هيساعدك إنك تكون أحسن على المدى الطويل. خليك فاكر دايمًا إن دي فترة وهتعدي, وهتعيش حالة حب تاني وبشكل أحسن وأنضج من الأول, ولو الانفصال كان مش إختيارك، إنك تكون أحسن نفسيًا ده من إختيارك.