UGOTBOX: خدمة جديدة من البريد المصري هتوفر عليك كتير في الشراء من أمريكا

معظمنا بيواجه مشكلة كبيرة لما بنشتري حاجات من برا وبندفع عليها جمارك وشحن بأسعار يمكن تبقى أغلى من سعر المنتج نفسه، لكن دلوقتي مع الخدمة اللي بيقدمها البريد المصري لأول مرة في مصر، واسمها UGOTBOX، هتقدر تشتري منتجات مختلفة من عدد من المواقع الإلكترونية خارج مصر، وتتشحن وتوصل لك لحد عندك من خلال البريد وبسعر أقل بكتير، والتكلفة في النهاية بتقل لإنك بتوفر فيها لحد 80% من مصاريف الشحن الدولي والمحلي ورسوم التخليص الجمركي وده طبعًا أكيد هيكون أقل عن ما كنت هتجيبها بأي طريقة شحن تانية.

الخدمة دي أطلقتها الهيئة القومية للبريد مؤخرًا، بمجرد ما تسجل مجانًا على موقع ugotbox.com، هتقدر تجمع مشترياتك من المتاجر في الولايات المتحدة الأمريكية، بالإضافة لتوفير مساحة تخزين مجانية لمدة 30 يوم علشان يتم دمج كل الطلبات في بوكس واحد لما تطلب الشحن لمصر، وده هيقلل تكاليف الشحن الدولي وكمان بيقدم خدمة متميزة للحصول على ثقة العملاء.

ومع UGOTBOX، مش هتتفاجيء يإيه مصاريف أو رسوم في الجمارك أنت مش عارف جاية منين زيّ ما متعودين، ولكن لأ، مع الخدمة دي، كل جنيه هتدفعه هتكون عارف هو رايح فين وهتكون على علم بيه من قبل ما تدفعه.

من أهم المميزات في الخدمة دي إن تم اعفائها من الضريبة داخل الولايات المتحدة الأمريكية، وكمان وكيل شحن البريد المصري في الولايات المتحدة بيتم معاملته معاملة التجارة الحرة، وده بيضمن قيمة تنافسية عالية بالإضافة لجودة متميزة، مع ضمان توصيل الشحنة للعملاء في أي مكان في مصر.

بطريقة بسيطة، تقدر تستخدمه وأنت بتطلب الأوردر من أي براند على الإنترنت في أمريكا، هتستخدم عنوان شركة UGOTBOX كعنوان الشحن الخاص بيك في أمريكا، وبكده هيتم شحن مشترياتك لمكانك المخصص في مقر UGOTBOX في أمريكا، وبعدها شركة UGOTBOX تشحن الطلب لعنوانك الحقيقي في مصر، وخبرائهم هيقوموا بعملية التخليص الجمركي بدالك وهيوصلوها لك لحد باب البيت.

آخر كلمة: متحمسين نعمل أونلاين شوبينج دلوقتي بطريقة أسهل!

تعليقات
Loading...
Tweet
Share
Share
Pin