“ازاي تبقى بلوجر في 3 أيام؟” “ازاي تبقى صانع محتوى وتحقق آلاف المشاهدات والمكاسب في مدة قصيرة؟” “احجز جلستك مع مستشار العلاقات الزوجية، أو اللايف كوتش”
فكرة ظهور مهن جديدة على الساحة ماكناش نعرف عنها حاجة من كام سنة فاتوا، بالنسبة للناس ممكن تكون غريبة شوية وبيسألوا هو امتى وازاي المهن دي ظهرت؟ وليه بقى في إقبال عليها كده؟ بس اللي اكتشفناه لما دوّرنا في التاريخ إن كل حاجة لها أصل.
تطور المهن عبر التاريخ حاجة ملحة
في تقرير عن تطور المهن على مر العصور على موقع بريطانكيا قسّم التطور تبع كل عصر وحاجته لمهن معينة علشان تسد الفجوة.
- العصر الحجري: هتلاقي إنه اتشكل فيه مهن معينة حسب حاجة الوقت ده، وكانت كلها بتتمحور حول مهنة الصيد والصنع البدائي، والجامع المسؤول عن جمع الثمار، والحرفي، واللي بيطحن الحبوب، وحارس القبور علشان يحميها من الحيوانات البرية.
- ولو جينا بصينا للعصر الزراعي اللي سبق الثورة الصناعية، هنلاقي إنه كان معتمد بشكل أساسي على الزراعة وتربية الماشية كمصدر رئيسي للغذاء والمواد الخام، وكان بداية لمهن تانية بدأت تظهر وأخدت تطور أكتر مع الثروة الصناعية زي الدكتور والتجار.
- وبعد الثورة الصناعية ظهر العصر الصناعي في القرن 18 وبدأ يظهر معاه شكل مهن جديدة زي: الصناعات الثقيلة والميكانيكية، مع تطوير المهن اللي ظهرت في العصور اللي قبل كده زي الحرف اليدوية والخياطة والحدادة بس المرة دي بشكل يتناسب مع مستوى التطور اللي حصل.
- ومع العصر الحديث بدأنا نشوف تطور على المستوى الاقتصادي وظهور مهن أكتر زي الإدارة والمحاسبة والتسويق والعلاقات العامة، وبين كل عصر والتاني كانت بتختفي مهن وتظهر مهن لا تعد ولا تحصى.
لحد ما جينا للعصر الرقمي وثورة التكنولوجيا الرقمية والإنترنت، وظهرت مهن جديدة بتعتمد في الأساس على استخدام التقنيات أو حتى ظهرت بسبب تغير التركيبة الاجتماعية وتغير الاهتمامات ودول بعضهم:
مدرب الحياة Life Coach
ده المسؤول عن مساعدة الناس على تطوير نفسهم وتحقيق أحلامهم، وبيبقى في أكتر من مجال، سواء في العلاقات أو الذكاء العاطفي أو حتى خسارة الوزن، وظهور مهنة زي دي نابع من شكل حياتنا اللي اتغير والتوقعات اللي بقت تعلى عن كل شخص وظهور ما يسمى بالخوف من الفقدان، كل الناس بتجري علشان تسبق وتطور من نفسها وتحقق حياتها ومش عايزة حاجة يفوتها فالايف كوتش كإنه بيزقهم ويوجههم.
البلوجر والإنفلونسر
البلوجر والإنفلونسر وصناع المحتوى على منصات التواصل الاجتماعي، كلها مهن ظهرت مع التطور التكنولوجي وبالتحديد مع ظهور السوشيال ميديا اللي بتعتبر جزء أساسي من عصر الرقمنة.
والإقبال عليها وسبب ظهورها بالتحديد هو إن شكل المحتوى كله اتغير، وده حصل لما بدأت الناس العادية في نشر تجاربهم الشخصية وبدأوا يحققوا مشاهدات ويوصلوا للناس بسهولة وده عمل نوع من التأثير عليهم بمعنى إنهم بقوا يملكوا سلطة معينة على الجمهور، ومن وقتها اتغير شكل الإعلان والتسويق وبقى يروح أصحاب المنتجات للبلوجر والإنفلونسر للتسويق لمنتجاتهم.
والنوع ده بدأت الناس تنجذب له بشكل كبير لأرباحه الكبيرة وإنه بيعمل نوع من أنواع الاستقلالية المهنية.
مدرب الألعاب الإلكترونية
الفيديو والألعاب الإلكترونية بقت جزء من حياة معظم البشر وبالذات بعد 2020 ووصل عدد مستخدميها حول العالم 2.69 مليار شخص، وبقى في مسابقات وبطولات دولية للألعاب بتوصل جوائزها لعشرات الملايين من الدولارات، ومع ظهور الحاجة إن الناس حابة تلعب وتكسب ظهر الحاجة لمدربين متخصصين يساعدوهم على ده.
مهندس بيئي
بمرور الوقت حصل تغييرات جذرية ومؤذية للبيئة وبالتالي ظهور وظيفة الأخصائي كانت شيء أساسي علشان يوفق ما بين التكنولوجيا والوسط المحيط، ويلاقي أنظمة جديدة للإدارة البيئية ووضع الحلول لمساعدة الكوكب.
وغيرهم من الوظائف اللي ظهرت مع عصر الرقمنة واللي لو جيت في أواخر التسعينات ماكونتش هتعرف عنها حاجة؛ زي (محلل البيانات) اللي بيشتغل على تحليل معلومات من خلالها يقدر يأثر على شركة أو مجال معين، والمبرمج ومطور مواقع الويب، والمدرس الأونلاين اللي خلق الصالات الافتراضية اللي بيتواصل من خلالها وده نتيجة تنوع المجالات والدورات التدريبية ومواقع الكورسات اللي كل منها بقى بحاجة مدرس في موضوع متخصص ممكن يجي يشرح لك من آخر الدنيا.
وكانت مع كل تطبيق أو برنامج جديد يظهر، بيظهر معاه الناس بتوعه، ظهر برنامج فوتشوب محتاجين حد يشرحه، ظهرت الروبوتات محتاجين وظيفة شخص مسؤول عن صيانتها بشكل دوري، ومع كل وظيفة كانت بتتطور مهاراتنا علشان تناسب حجم التطور وبقى في وظائف للمتخصصين يساعدوك تطورها.
بعد ما شوفنا شكل التطور في المهن والوظائف اكتشفنا إن ده شيء طبيعي على مر العصور وغير مفاجيء، والتطور ده كان له عوامل ساعدته، عوامل متشابكة وكلها متربطة ببعض وبتوصل لبعض، سواء على المستوى الاقتصادي أو التعليم اللي كان بيجبر الناس إنها تطور من مهاراتها أو التغيرات الديموغرافية اللي غيرت بالتبعية التركيبة السكانية والعمرية، ومع فكرة العولمة نفسها اللي ساعدت على زيادة المنافسة في الأسواق وخلى كل العالم مفتوح على بعضه وخلى التطور أسرع، لحد ما وصلنا لثورة التكنولوجيا وعصر الرقمنة وشفنا مهن جديدة عمالين نتفاجيء بيها.