#الروشتة_ المكتوبة _خطر.. تريند ظهر على مواقع التواصل الاجتماعي، مش لسبب معين ولكن علشان يفكروا الناس بمشكلة أزلية عايشينها وبنعيشها كل يوم مع الدكاترة.
روشتة بتستلمها من الدكتور مكتوب فيها لوغاريتمات وألغاز عبارة عن شخبطة في كل حتة بيعجز الناس عن فكها وحل شفرتها، وكل لما تبقى مكتوبة بخط مش مفهوم ومعقد كل ما كان ده بيدي لك إيحاء إن الدكتور اللي كتبه إما هو شاطر أوي، علشان كده خطه وحش فالمعلومات بتطلع متبعثرة مش بيلحق يلمها، وإما تدي لك إيحاء إنه مستعجل أوي، المهم إن مفيش حل وسط.
الفكرة كمان مش بس بالنسبة للناس العادية اللي ممكن ماتقدرش تقرأها، الموضوع بيوصل لأبعد من كده، والصيدلي نفسه أوقات مابيقدرش حتى يترجمها، فيا ترى العيب كده من عند مين؟
بعض دول العالم دلوقتي علشان تقلل من معاناة قراءة الروشتة اللي بقت أصعب من طعم الدوا، قررت تستخدم تقنيات الذكاء الاصطناعي علشان تترجم اللي مكتوب والناس بقت تعمل فيديوهات لـ “فك لوغاريتمات الروشتات” ولا كأنها وصفة ولها مقاديرها وتطبيقات بتعمل منها مسح للروشتة وتترجم لك.
السؤال هنا، ليه ماتخرجش كل الروشتات مطبوعة من عند الدكتور ويبقى الموضوع معمم على كل المستشفيات والعيادات؟ ونوفر معاناة أزلية، بدل ما كل مرة الصيدلي يصرفلي دوا كحة بدل المسكن!