الأقصى (أولى القبلتين وثالث الحرمين) مكان مقدس عند كل العرب وبالأخص المسلمين، أقدم مسجد اتبنى على وجه الأرض، واللي قال عليه سيدنا محمد “لا تشد الرحال إلا إلى ثلاثة مساجد، المسجد الحرام، ومسجدي هذا (المسجد النبوي)، والمسجد الأقصى).. للأسف هو تقريبًا أكتر مكان متعرض للاعتداء.
لسه لحد دلوقتي بيتعرض المسجد لاعتداءات كتير، تقريبًا كل سنة وسببها الأساسي هو منع المصلين إنهم يمارسوا شعائرهم الدينية بحرية، وكان أخرهم اعتداء من كام يوم علشان يتمنع المصلين من الدخول للصلاة في العشر الأواخر من رمضان، وكان نتيجة الاعتداء ده إصابة أكتر من 200 فلسطيني إصابات بالغة، والاعتداءات طالت باب العمود وحي الشيخ جراح اللي كلنا تابعنا قصته بالتفاصيل الفترة الأخيرة.
وده ماكانش أول ولا أخر اعتداء بيحصل على مسجد الأقصى، علشان كده قررنا نفكرنا ونفكركم بأبرز الاعتداءات علشان ماننساش..
أبرز الاعتداءات على المسجد الأقصى
- 1967، بعد النكسة دخل الجنرال موردخاي في اليوم التالت من الحرب هو وجنوده، ورفعوا العلم الإسرائيلي على قبة الصخرة، وحرقوا المصاحف، وصادروا مفاتيح أبوابه، وقفلوه لمدة أسبوع كامل، ومنعوا خلاله الصلاة والأذان، واستولوا على حائط البراق وتحويله لمزار لليهود.
- 1981، اقتحم أفراد حركة “أمناء جبل الهيكل” وجماعات أخرى ورفعوا العلم الصهيوني مع التوراة.
- 1996 انتفاضة النفق اللي راح فيها 51 فلسطيني.
- 1969، صهيوني حرق جزء من الجامع القبلي.
- 1983، تشكيل حركة متطرفة في “إسرائيل” وأمريكا وكانت مهمتها إعادة بناء جبل الهيكل في موقع المسجد الأقصى.
- 2000، عملوا متحف يهودي قرب المسجد الأقصى.
- 2004، مستوطنة من مستوطنات “تكواع” عملت حفل زفاف لابنها داخل المسجد الأقصى وكان في خمور ونبيذ من غير أي مراعاة لحرمة المسجد الأقصى.
- 2010، شرطة الاحتلال سمحت لأحد حاخامات الحريديم لأول مرة بأداء طقوس صلاة يهودية كاملة والسجود بشكل كامل قدام قبة المسجد الأقصى.
- 2014، اقتحمت القوات الخاصة الصهيونية المسجد عن طريق باب السلسلة وحاصرت المصلين وهاجمتهم بالقنابل الصوتية والأعيرة المطاطية.
- 2015، عناصر من شرطة الاحتلال اعتدوا بالضرب على المصلين في المسجد الأقصى بعد ما اتصدوا لمحاولات لأحد العصابات اليهودية لاقتحام المسجد.
- 2016، منعت شرطة الاحتلال احدى الطواقم الفنية التابعة للطواقم الفنية من ترميم إحدى مصاطب المسجد الأقصى المبارك.
- 2000، ارتكبوا مجزرة بحق المصلين راح ضحيتها عشرات الشهداء والجرحى.
دول كانوا مجموعة من ضمن الاعتداءات اللي تمت على المسجد الأقصى من وقت احتلالها، بس الحقيقة إن الاعتداءات كانت عددها أكبر بكتير من مجرد قايمة أو مقال نكتب فيها بعضهم، وإنك تكتب عن اعتداء حصل غير لما تشوفه وتعيشه، ده غير إن في صحف قالت قبل كده إنهم أكتر من 200 اعتداء على مدار احتلال 70 سنة.