مقابلات الشغل من الحاجات اللي بتحدد مصائر ناس كتير لسنين قدام، وفي ناس بتبقى خبرتها قليلة في الموضوع ده وممكن تلاقي نفسها بتلبس وهي مش واخدة بالها، ومش عارفة إن مع كل سؤال بيتسأل في فخ ملغم بقنابل مفخخة، وعلشان مايتضحكش عليك وأنت لسه أخضر ورور، هنقولك على أسئلة لو اتسألت لك.. اجري!
مواعيدنا هتبقى مرنة
ودي معناها إنك مالكش مواعيد شغل رسمية زيّ باقي البشر، يعني مش هتبقى عارف أنت هتروح امتى ولا هتيجي امتى، مفيش جو الـ 8 ساعات وبعدها تروح شايل البطيخة للمدام على إيدك، أنت هتبقى على الله حكايتك، يعني ممكن تلاقي نفسك في أيام بتشتغل طول اليوم من غير ما تحس، وممكن تلاقي مديرك بيكلمك الساعة تلاتة الفجر ويبقى زعلان أوي إنك ماردتش عليه من أول مرة.. مرنة بقى.
أنت هتبقى عمود الشركة
أنت ابن الشركة ولا عمودها ولا الشركة هتتسند عليك ولا أنت حتى الشركة نفسها، كل دي جمل سامة اتفقوا عليها كل الدكاترة النفسيين لما كانوا بيحللوا صفات بيئة العمل السيئة، لإن بعد الجملة دي للأسف أنت هيتمسح بك الأرض. وكمان هيتقالك احنا بنستثمر فيك، وفي الحقيقة هو بيكبر الشركة ويستثمر فيها علشان أولاده وأحفاده، مش علشان خاطر عيونك ولا علشان متبنيك.
هنكبر مع بعض
هنكبر مع بعض، جملة ثعبانية تحسسك إنك واحد من الشركة وإنك بتنتمي لها، بس في الحقيقة دي بتلمح لنوايا خبيثة؛ منها إنه عايز يفتح معاك موضوع المرتب وإنه هيتخسف به الأرض، وفي الوقت نفسه يحسسك بالذنب إن الأوضاع الاقتصادية صعبة، خصوصًا لو الشركة لسه جديدة في السوق، فهنكبر مع بعض واعتبر إننا بنحوشلك معانا.
لازم تبقى شفاف
واضح إن شخصيتك قوية وده باين من ردودك معانا، وواضح برضه من خبرتك إنك شوفت ناس واتعاملت مع شخصيات كتير في الشغل، وأكيد احنا كلنا هنا بيهمنا مصلحة الشغل ومش عايزين أي حاجة تحصل تأثر على هدوء وسلامة وجو والمكتب، أو تعطل من مسيرة العمل، فلو صادفك أي موقف غريب، يا ريت تيجي تقولنا علشان نلحق المشكلة قبل ما تحصل… مقدمة جميلة وكلام منمق غرضها حاجة واحدة إنك تبقى “عصفورة الشركة”.
جو المكتب
من قبل حتى ما تدخل تعمل مقابلة الشغل مع الاتش آر، خلال قعدتك وأنت مستني دورك، حاول تراقب جو الموظفين عامل ازاي، يا ترى مرسوم على وشهم السعادة والانبساط والطاقة الإيجابية بتشع منهم، ولا كل واحد فيهم داخل وخارج يخبط على المكتب ويأفأف ويبرطم ويشتم في سره وباين عليه الانطفاء، ولا زانق زميله في زاوية وبيهدده، كل ده ممكن يدي لك إلى حد ما نبذة عن سياسة الشركة وجوها العام.
آخر حاجة بقى حبينا نختم بها لإنها مشكلة أزلية لناس كتير في الشغل، اوعى توافق إنك تشتغل بعد ساعات العمل الرسمية لو مفيش نظام تعويض لساعات الشغل الزيادة، ولو قالك في المقابلة احنا شغالين على معيار ونظام يقدر يعوض الناس.. قولهم “في المشمش”.