في ضوء انتشار فيروس الكورونا (كوفيد-19) والأوضاع الاستثنائية اللي متطبقة دلوقتي على العالم كله، بتفكر لجنة تسيير معرض إكسبو 2020 دبي في تأجيل الحدث العملاق ده لمدة سنة كاملة، وده علشان يدوا فرصة للسياحة ورجال الأعمال إنهم يعوضوا خساير الركود الإقتصادي بتاع الفترة دي ويستعيدوا نشاطهم.
اتشاورت لجنة تسيير المعرض مع الدول المشاركة فيه في الاجتماع التاني ليهم على الأنترنت في تداعيات الفترة دي وكل بلد اتكلمت مع أعضاء اللجنة في التدابير الاحترازية العالمية اللي لازم ياخدوا بيها علشان يضمنوا صحة وسلامة الناس اللي بتجهز للمعرض في دبي.
وبما إن عدد حالات الكورونا المؤكدة في الإمارات عدت الألف، فإن مُنظمي إكسبو 2020 دبي بيأكدوا قلقهم الشديد على تأثير عوامل إنتشار الفيروس على الاقتصاد العالمي. فالوباء أصاب أكتر من مليون شخص في العالم، وقتل أكتر من 80 ألف والأعداد بتزيد كل يوم.
وفي نفس الوقت أكدت لجنة تسيير المعرض في بيان صحفي ليها دعمها للجهود الدولية في الحد من انتشار الفيروس، وبناءً عليه قال أعضاء اللجنة إنهم وافقوا على اقتراح تأجيل افتتاح المعرض لمدة سنة كاملة. والقرار ده أخدته اللجنة بالإجماع مع المكتب الدولي للمعارض BIE، المُنظمة المسئولة عن إكسبو الدولي.
وقالت ريم الهاشمي وزيرة الدولة لشؤون التعاون الدولي المدير العام لمكتب إكسبو 2020 دبي : “الموقف يتطور بسرعة في العالم، وما زال لا يمكن التكهن بتطوراته. خلال الأسابيع الماضية، كنا نتشاور بصفة مستمرة مع الأطراف المعنية الرئيسية في دولة الإمارات والعالم لمراجعة أثر “كوفيد – 19″ على خططنا وتجهيزاتنا لإكسبو 2020 دبي”.
وأضافت “بينما ما زلوا ملتزمين بثبات على المشاركة في إكسبو 2020 دبي، فإن الكثير من البلدان تأثرت كثيرا بكوفيد-19، ومن ثم فقد عبّرت هذه البلدان عن حاجتها لتأجيل افتتاح إكسبو 2020 دبي لمدة عام، بما يسمح لها بالتغلب على هذا التحدي… قد استمعت لهم دولة الإمارات العربية المتحدة وإكسبو 2020 دبي .. وبروح التضامن والوحدة، فقد دعمنا مقترح طلب دراسة مسألة التأجيل لعام واحد خلال اجتماع لجنة التسيير اليوم. نتطلع إلى الترحيب بالعالم، الذي نثق تماما أن هذا التحدي سيزيده قوة وعزيمة بعد التغلب عليه” .
يعتبر إكسبو من أكبر وأعظم معارض في العالم كله، وكانت المفروض تبدأ نسخة 2020 يوم 20 أكتوبر وتفضل مستمرة لحد 10 إبريل 2021 بمشاركة 192 دولة. وكان من المتوقع إنه يزور دبي حوالي 25 مليون شخص علشان يحضروا المعرض ده.
وبالرغم من كل التحديات أكد منظمي المعرض على إلتزام الإمارات بتنفيذه بالشكل اللي بيعبر عن الهدف من تأسيسه. وكل أمة الإمارات بتشتغل ايد في ايد مع شركائهم الدوليين علشان يقدروا يخلوا المنصة العالمية دي تتغلب على كل الصعاب اللي بتواجهها وبتواجه العالم ككل.