من ساعة انتشار وباء فيروس الكورونا وإلغاء كل الحفلات والتجمعات في أغلب الدول العربية بداية من الشهر اللي فات، ابتدى يتجه الفنانين للسوشيال ميديا عشان يعملوا حفلات لايف ويشجعوا جمهورهم على القعاد في البيت.
كان من أوائل الفنانين العرب اللي عملوا الحفلات دي تامر عاشور ومسار إجباري اللي حققوا نجاح كبير جداً ووصلوا لملايين من جمهورهم. فلما اتكلمنا مع هاني الدقاق مغني فرقة مسار إجباري قالنا إنهم حسوا إنها مسؤلية عليهم إنهم يقعدوا و يغنوا مع الناس، وهو شايف إن اللايف ده كان فرصة حلوة لكل جمهورهم إنه يشوفهم ويستمتع بمزيكتهم من الصف الأول.
ومن بعدهم ابتدت حفلات كتيرة جداً تتعمل بشكل شبه يومي زي حفلات عزيز مرقة وديسكو مصر ومايك ماسي اللي قرر يغني مع جمهوره بالبيجاما من البيت، ورامي عياش وأحمد جمال.
وتحت شعار “خليك في البيت الثقافة بين إيديك” قررت وزارة الثقافة المصرية بالتعاون مع دار الأوبرا إنهم يعرضوا حفلاتها المتسجلة أون لاين، ونزلت برنامج بتتعرض فيه حفلات مختلفة كل يوم الساعة 9 بليل.
ومن أبرز حفلات دار الأوبرا اللي لسة متعرضتش حفلة يوم الحد 12 إبريل مع علي الحجار اللي عمل بدوره أكتر من حفلة لايف الفترة اللي فاتت، وبدأ ينزل حلقات من برنامجه “ساعة تجلي” اللي بيغني فيه مع فرقته من جوه الأستوديو بتاعه.
ويوم الأربع 15 إبريل هتعرض دار الأوبرا حفلة لسميرة سعيد اللي لسه منزلة قريب أغنية جديدة بتعبر عن الواقع اللي بنعيشه الفترة دي.
و يوم الخميس ١٦ إبريل هيكون في حفلة عيد الربيع مع هاني شاكر، وفرقة رضا هينزلها عرض خاص يوم 19 إبريل. أما يوم 20 إبريل فهيكون مع محمد الحلو وفؤاد زبادي. والإنشاد الديني هيتعرضله حفلة يوم 22 إبريل مع محمد ثروت. وآخر حفلات دار الأوبرا هتكون الخميس 23 إبريل مع علي الحجار تاني في أوبريت “نضارة سودا” اللي هيتعرض في ذكرى سيد مكاوي وصلاح جاهين.
فنانين وفرق تانية كتيرة بتحضر لحفلات ومفاجئات مختلفة لجمهورها، وفي اللي ابتدوا ينزلوا أغاني وتراكات جديدة زي فرق وسط البلد وكايروكي ومسار إجباري اللي بيثبتوا إن الفن عمره ما هيقف ولا هيتأثر بأي ظروف.