الفترة اللي فاتت كانت مثيرة في مرسى علم، اللي هي واحدة من أكتر الأماكن الساحلية الساحرة في مصر، وده بعد ظهور قرش النمر اللي أتسبب ظهوره ده في إصدار اللواء عمرو حنفي، محافظ البحر الأحمر، قرار بوقف كل الأنشطة البحرية والغوص وغيرها في جنوب البحر الأحمر لمدة ٥ أيام. وفي اليوم العالمي للمحيطات، حبينا نتكلم أكتر عن قرش النمر وأسماك القرش في العموم وطريقة التعامل معاها.
إيه القرارات اللي طلعت علشان القرش؟
على طول طلعت قرارات بوقف كل أنشطة الغطس والصيد والسنوركلينج والكايت سيرف والويند سيرف في منطقة شعاب الفنستون بمرسى علم، كمان هيتم تشكيل لجنة من الباحثين للمحميات الطبيعية في البحر الأحمر وجمعية المحافظة على البيئة لمراقبة حالة أسماك القرش بالمنطقة.
قرش النمر أخطر أنواع أسماك القرش
قرش النمر وبيتسمى برضه قرش نمر البحر وهو واحد من أسماك القرش الأكثر خطورة في العالم، وده لإن حواسه قوية جدًا. وقرش النمر من أنواع أسماك القرش المهاجرة وممكن تلاقيه عايش جنب الشعاب المرجانية، والموانيء، والقنوات، وده بيخلق خطر كبير على الناس.
ازاي تواجه هجوم أسماك القرش؟
في سكوب إمباير، حاولنا نجاوب على أسئلة زي ازاي نتعامل مع أسماك القرش؟ ونعرف طبيعتها ازاي؟ وأتواصلنا مع الغواص المحترف أحمد البنا، اللي وضح لنا حاجات كتير عن سمك القرش.
في الأول بنا وضح لينا إن أسماك القرش مهمة للحياة البحرية في أي مكان وبتدل على التنوع اللي فيها، كمان كلمنا عن طبيعتها وإن في فعلًا أنواع بتحب الدم بس دي قليلة جدًا ومش مكانها البحر الأحمر وده مش العادي. كمان أضاف إن القرش بيشبه الكلاب في طباعه؛ يعني بيحب الاستكشاف ومش بيقصد يهاجم إنسان، وفي الغالب بيبقى مش عاوز أصلًا.. بنا كمان وجه بعض النصايح المهمة لمحبين الغطس أو السباحة في مناطق ممكن يكون فيها سمك قرش، ولخصناها في النقط دي:
- عوم في جماعات عشان أسماك القرش بتحب تهاجم اللي بيعوموا لوحدهم أكتر.
- ماتعومش في الليل أو الفجر علشان أسماك القرش بتنشط في الأوقات دي.
- لو أتعرضت لجرح حتى لو صغير، أخرج من المياه على طول علشان أسماك القرش عندها حاسة شم قوية جدًا.
- بلاش لبس هدوم أو مجوهرات بتلمع علشان أسماك القرش مش بتشوف كويس وده بيلفت نظرها.
- في حالة هجوم القرش، مافيش هندك اختيار إلا إنك تحافظ على هدوئك والتفكير بطريقة ذكية للخروج من الموقف، خصوصًا إن صعب حد يتغلب على القرش في السباحة، كمان التوتر هيحفزه.
- من الضروري معرفة مكان القرش ومراقبته وأنت بتنسحب في هدوء .
- الصخور والشعب المرجانية ممكن تساعد الغطاسين على حماية نفسهم من هجوم أسماك القرش، ولو مافيش بس أنتوا أكتر من حد مع بعض، أتحاموا في بعض وأدوا ضهركم لبعض وانسحبوا بشكل تدريجي من المكان.
- التظاهر إنك ميت مش هيحميك من الهجوم علشان كده القتال أحيانًا هيبقى حل منطقي، وممكن توجه ضربة قوية في خياشيمه أو عينه وده بيجبره على التراجع.
- ممكن تضربه في راسه بآله حادة زي صخرة أو كاميرا، كمان ممكن توجه ضربات بركبتك ورجلك.
- لو القرش فضل يدور حواليك، ده معناه إنه على وشك الهجوم.
- زي الكلاب بالظبط، القرش بيحترم الحزم في التعامل زي إنك تواجهه وتبص له في عينه من غير تهور في هجوم هتكون خسران فيه طبعًا، بس ده ممكن يخليه ينسحب ويحترمك.