“ساحل تاني خالص”: تعالوا نشوف تجربة Roam Egypt المختلفة في الساحل الشمالي

مصر مليانة كنوز، والعظيم في ده إن الخفي منها أكتر أضعاف من المعروف، ومش كتير اللي يعرف الطريق ليها، حتى أهل البلد. فعلًا ممكن الحاجة تكون قدام العين، لكن صعب تتشاف. مؤخرًا ظهر على الساحة عدد من المبادرات الداعمة للسياحة هدفها توعية المصريين والزوار بمدى روعة البلد وجمالها اللي مالوش نظير، كتير من المبادرات دي ركزت على المعالم المعروفة، لكن قليل اللي كان بيوريك ازاي توصل للجواهر الخفية، والأهم من ده ازاي تعيش التجربة فيها، وده اللي شوفناه مع Roam Egypt اللي وزارة السياحة والآثار المصرية مقدمة له كل الدعم والجهد، واللي حابين نوجه للوزير خالد العناني كل الشكر على المساعدات والدعم اللي قدمهم.

يمكن من أهم المبادرات اللي بتحاول تقدم المحتوى ده بشكل مختلف هي “Roam Egypt”، اللي أسسها تيمور عثمان، المصور والرحالة المصري، والمخرج والمنتج المشهور رؤوف السيد، وبدعم من وزارة السياحة والآثار قرروا يبدأوا في حملة توعية سياحية عن طريق برنامج وحلقات بتنزل بشكل دوري على صفحاتهم على مواقع التواصل الاجتماعي، ومن خلالها بيعيّشوا المتفرج تجربة حية في وجهة سياحية معينة فيها كل اللي محتاج يعرفوا عن الوجهة دي، وازاي يقدر يستمتع برحلته بكذا شكل ويلاقي الخبايا والأسرار اللي مايعرفهاش أي حد واللي بتدي للتجربة طعم مختلف.

يمكن من أكتر الوجهات المفضلة بالنسبة للمصريين وغيرهم من السياح في فصل الصيف هي الساحل الشمالي، ولحد مازارش الساحل قريب كل اللي هيفكر فيه لما يفكر في الساحل هو الـ Nightlife والحفلات والمزيكا العالية، وعلى الرغم من إن ده موجود، لكن حصر وجهة الساحل في النطاق ده هو ظلم ليها، لإن الساحل مليان كنوز ماحدش يعرف عنها حاجة.

في حلقتهم الجديدة، تيمور ورؤوف بيقدموا لنا الساحل بشكل جديد ومختلف، وبيورونا حاجات ماكناش نعرف إنها ممكن تتعمل هناك أصلًا.

بتبدأ الحلقة بزيارة لـ Kiki’ Beach، اللي ببعتبر من الأماكن القليلة في الساحل اللي مش بتقفل على مدار السنة، وهناك بعد شوية يوجا، وأجواء استرخاء لطيفة، شوفناهم بيجربوا أحلى فطار في الساحل اللي موجود بس في المكان ده، بعدها عاشوا تجربة التخييم وداقوا المندي على أصوله في جيفيرا.

بنشوف ساحل تاني خالص بعد تجربتهم في البحر والـ activities المختلفة اللي ممكن تتعمل هناك من الـ surfing للـ jet skiing، وبتنقلنا الكاميرا من كادر أزرق هادي لأصفر صحراوي بنقابل البدو في السلوم وبنعرف أكتر عن تراثهم وعاداتهم وبنتعلم عن سباق الجمال اللي بيتعمل هناك كل شهر وبتشارك فيه مصر والإمارات.

مش بس كده، تيمور ورؤوف بيورونا ازاي لو أنت ليك في الموضة تقدر تحضر عروض أزياء في Dolls and Dons ولو مهتم بالفنون والثقافة تقدر تزور المتحف الحربي والنصب التذكاري البريطاني في العلمين، أما بقى لو أنت بتاع مغامرة ونفسك تروح تستكشف أماكن جديدة فتقدر تزور السفينة المهجورة أو هرم الطيار الألماني، وبعد كل ده تقدر تختم يومك بجولة تنافسية في ICC Go Carts.

طب بالنسبة للغدا؟ وسط كل الأماكن الكتير في الساحل اللي تقدر تاكل فيها، Roam Egypt اختاروا ليك مريلينو لو عاوز تجرب المطبخ الإيطالي، أما لو ليك في الشامي فعليك وعلى أم علي.

الساحل اللي شوفناه مع Roam Egypt حاجة مختلفة ماشوفنهاش قبل كده خالص، ومش بس مجرد وجهة محصورة على الـ nightlife والخروجات، لا ده بقى حاجة أكبر من كده بكتير.

آخر كلمة: هتطلع الساحل في الخريف؟

تعليقات
Loading...