ناس كتير الفترة دي مصابة بفيروس كورونا وخصوصًا بمتحور أوميكرون، وللأسف في بعض الحالات ويمكن أغلبها، الأكل والشرب بيأثر على الحالة الصحية، في حاجات ممكن يتناولها المريض تزود عليه التعب وتزود من حدة الأعراض، وفي أكلات تانية بتساعد على تهدئة الأعراض وبتساعد كمان في سرعة الشفاء، تعالوا نعرف زيّ إيه.
الفواكه والخضروات
معلومة منتشرة بشكل علمي من بداية جائحة كورونا، والسبب في النصيحة دي الفيتامينات والمعادن اللي موجودة في الفواكه والخضروات، والجسم بيكون محتاجها بشكل أكبر في وقت المرض علشان تقوية المناعة، ده غير إنها بتهدي من أعراض الفيروس.
الأسماك
خصوصًا سمك السلمون والسردين، لإنها مصادر أحماض أوميجا 3 الدهنية، بتساعد بشكل كبير في تقليل حدة أعراض الفيروس وبتساعد في سرعة الشفاء وتقليل الالتهاب المصاحب لكورونا، لإنها مضادة للفيروسات.
المكسرات
لإنها غنية بالبروتين النباتي، اللي يعتبر مهم للحفاظ على كتلة العضلات سليمة في الوقت اللي المريض بيكون فيه نشاطه البدني قليل، وفي نفس الوقت الجسم بيحرق طاقة لسرعة الشفاء، فالبروتين مهم في تعويض الطاقة اللي ممكن قلتها تأثر على الكتلة العضلية في الجسم.
الحبوب الكاملة
زيّ الشوفان والذرة والفشار، لإن الحبوب دي بتتضمن خصائص مضادة للالتهابات، اللي بيسببها فيروس كورونا في الجسم زيّ أي فيروس، لكن الخصائص الموجودة في الحبوب الكاملة بتقلل من خطرها بشكل كبير. وممكن في طبق واحد تجمع أكتر من حاجة مفيدة، زيّ الشوفان مع فاكهة وعليهم مكسرات.
الزبادي
لإن خصوصًا متحور أوميكرون يعتبر من أشد أعراضه التهاب الحلق، فالزبادي بيكون اختيار كويس للمريض لإنه بارد، ده غير إنه غني بالبروتين اللازم للمريض في الفترة دي.