للأسف في بعض المفاهيم المغلوطة اللي بقيت مترسخة في عقول كتير من الناس، خصوصًا الأجيال الجديدة.. هي فكرة إنك تكون “تقيل”. مش مضطر أبرر للمقربين ليه اختفيت أو اتغيرت. مش هعتذر عن أي حاجة عملتها، ومش هعترف لما أحس إن في مشكلة في علاقتنا، لكن هاخد جنب. هي دي روشتة القوة والاستقلال بالنسبة للبعض.. بس هل ده حقيقي؟ هل تصدير الصورة الجافة دي تستحق إننا نخسر علاقتنا مع الناس اللي بنحبها بسببها؟
طبعًا مفيش قاعدة ثابتة، ولكن اللي الحالات اللي بنتكلم عنها هي الصداقات والعلاقات اللي فيها من الذكريات الجميلة والعشرة ما يكفي إنها تستاهل المحاربة والحفاظ عليها. والقوة الحقيقية بتكون في مدى تمسك الشخص بالناس اللي في حياته وتحمله من المسئولية ما يكفي إنه يقدر يناقش الوضع ويحاول يحله، بدل ما يغلب مشاعر الغرور والعند أو حتى الاستسهال، وينتهى الأمر بانتهاء علاقة جميلة كانت ممكن تستمر بشوية نقاشات وتواصل صادق.
كلام بنشوفه على السوشيال ميديا زيّ “كلنا فترات في حياة بعض”، “كل الناس بتتعوض”، “احنا لسه هنتعاتب؟ اقطع على طول”، وأي بوست بيتضمن أراء مشابهة هو ببساطة بيشجع على خلق حواجز نفسية كتير بينك وبين اللي حوليك وحتى بينك وبين نفسك. لإن الإنسان بطبيعته بيحب تكون علاقاته جيدة وبيحتاج للناس في حياته. ولكن الأفكار دي ممكن تأثر على الشخص وتجبره إنه يتصرف على عكس طبيعته، اعتقادًا إن ده الصح وإن غير كده هيبان إنه ضعيف أو vulnerable.
لأ في ناس ما تتعوضش. في ناس رصيدها يستحق منك إنك تتعب علشان تحافظ على علاقتك بيهم. في ناس هيحبوك ويخافوا على مصلحتك من قلبهم، وخسارتهم هتبقى خسارة كبيرة. العتاب حتى لو ظهر خارجيًا إنه شيء متعب ومش مريح، لكنه هيكون أحسن ألف مرة من إنك تتجنبه وفي المقابل تخسر إنسان كان له تأثير إيجابي ومؤثر في حياتك. حاجات يمكن ماتقدرش تلاقيها في حد تاني.
مفيش عيب أبدًا في مناقشة الحاجات اللي ممكن تكون مضايقة حد منك أو العكس. مفيش عيب في الاعتراف بغلطنا والتصليح منها للحفاظ على علاقاتنا. جبر الخواطر اللي بيتمثل في إظهارك لحبك وحرصك على صديق أو قريب إن تفضل علاقتكم قوية، مفيهوش أي شيء من الضعف، بالعكس. اللي يقدر يواجه أزمات في علاقاته بشكل صحي، ويكون فارق معاه مشاعرك والحفاظ عليك، فحياته أكتر من اهتمامه بالـ Ego أو إنه يظهر بصورة إنه الشخص اللي مش فارق معاه ومش مستعد يعتذر لحد.. ده شخص ما نقدرش نطلق عليه أي حاجة غير إنه شخص قوي وناضج، بيدرك أهمية الأشياء اللي لا تعوض.