لو سألنا إيه ممكن تكون العلاقة اللي بتجمع بين الفن والطب، ممكن البعض يفتكر إن مفيش عامل مشترك بيلتقي فيه الاتنين. ولكن الحقيقة لو فكرنا هنلاقي إن اللي بيجمعهم حجات كتير، زى الاهتمام بصحة الإنسان سواء الجسدية أو النفسية. بيجمعهم الاهتمام بحكاية الإنسان وحياته.. إنه يقدر يتخلص من العقبات ويحصل على حياة سعيدة. ومن المفهوم ده، طلعلنا مهرجان ميدفيست، فتعالوا نتعرف أكتر عنه وعن أسباب نشئته.
إيه هو ميدفيست مصر؟
ميدفيست هو مهرجان بيجمع بين عالم السينما والطب، فبيتم عرض أفلام سينمائية بتناقش قضايا متعلقة بالطب زى الصحة النفسية. ميدفيست مصر هو النسخة العربية من مهرجان Medfest اللي بيقام في بريطانيا، واللي بيتم من خلاله عرض أفلام سينمائية ومناقشتها وتحليلها من قبل الجماهير وكمان من المتخصصين في السينما والطب ولكن الحاضرين بيكونوا طلاب كلية الطب بس.
أما النسخة المصرية للمهرجان الدولي للأفلام القصيرة، فبتكون على نطاق أوسع وبتُعرض لجمهور العام. فالهدف من المهرجان مش مجرد عرض الأفلام، ولكن كمان لهدف فتح نقاش والتعرف على آراء مختلفة لنفس القضايا. فهو يعتبر أول مهرجان من نوعه في منطقة الشرق الأوسط وشمال إفريقيا لدمج كل من صناعة الأفلام والفنون وعالم الصحة من خلال تجربة سينمائية مختلفة. وتم تأسيس ميدفيست مصر من سنة 2017، ولسه مستمر لحد دلوقتي.
ميدفيست مصر النسخة الـ 2021
هينظم المهرجان فعاليات ميدفست إيجيبت نايت، في السابعة مساءً يوم الاربعاء ٨ سبتمبر من الشهر الجاري. وهتبدأ الفعاليات بعرض أفلام قصيرة تسلط الضوء على قضايا صحية ومجتمعية مثل الصحة النفسية، وصحة المرأة والطفل والأسرة، ومن بعدها هتعقد جلسة نقاش تحت عنوان “تأثير الفن على الفنان وتأثير الفن على المتلقي”.
وبجانب عرض الأفلام، هيتم إعداد برنامج مواز من ورش العمل والمحاضرات ودروس الماجستير، بالإضافة لإقامة معرض صور فوتوغرافي للمصورين المشاركين والفائزين في مسابقة التصوير الفوتوغرافي اللي أطلقتها ميدفست مصر تحت عنوان “لحظات” بالتعاون مع كانون، وهتنتهي الفعاليات بتوزيع جوائز للفائزين في المسابقة.