أعلنت دار الإفتاء عن إنشاء حساب جديد ليها ولأول مرة على منصة “تيك توك”، وأكدت إن الحساب ده هدفه الأساسي هو نشر الوعي وعلشان يبقى في فرصة أكبر وأحسن للتواصل مع الناس، والمنصة تبقى وسيلة ينشروا منها كل الفتاوي الصحيحة ويصححوا بعض الفتاوي اللي اتنشرت بشكل غلط على لسانهم في الفترة الأخيرة وكان نتيجتها جدل كبير على السوشيال ميديا.
وده كان وفقًا لتصريحات لدار الإفتاء في المؤتمر العالمي السادس واللي من خلاله قرروا إنهم يحطوا استراتيجية علشان يبدأوا في تنفيذ كل التوصيات والمشروعات المهمة اللي اتقالت في المؤتمر.
مؤخرًا، أصدر شيخ الأزهر على صفحته بعض الفتاوى المهمة اللي تخص المرأة واللي ليها علاقة بالسفر والجواز والشغل والشبكة والطلاق وأمور تانية كتيرة كان حوليها جدل وماكانتش متحددة المعالم بالنسبة للجمهور.
زيّ مثلًا مشكلة السفر بدون محرم، الناس كانت فاكرة إنه حرام في كل الأحوال، لكن دار الإفتاء قالت إنه يجوز لو كان السفر أمنًا وفي وسط مجموعة من الناس ممكن يؤتمن عليهم، وحاجات تانية زيّ بيت الطاعة وإن مفيش حاجة اسمها كده في الإسلام وده يعتبر إهانة للمرأة ولكيانها ولكرامتها. وفي الأمور المتعلقة بالميراث اتقال إن من حق الزوجة إنها تحدد نصيبها من ثروة زوجها وده في حالة إنها شاركت في زيادة الثروة دي وساعدته.
وكتير من الأمور اللي كانت محتاجة توضيح واللي لسه محتاجة برضه، علشان كده حل إنشاء حساب على “تيك توك” كان مناسب وخطوة كويسة في الفترة دي، خصوصًا إنها ضمانة إن المحتوى يوصل لفئة أكبر من الجمهور ومختلفة كمان في الفئة العمرية.