المانجو الباكستاني هي واحدة من أشهى وأغنى فواكه العالم بالفيتامينات، وفي دبي، قرر صاحب سوبر ماركت باكستاني إضافة جرعة من المغامرة والمفاجأة على طلبات المانجو اللي بيوصلها للبيوت في عصر الكورونا.
بداية من نص يونيو، قرر المسئول عن مجموعة “باكستان سوبرماركت” إطلاق خدمة توصيل المانجو للمنازل باستخدام عربية لامبورجيني هوريكان، وده جزء من حملة السوبرماركت لنشر الحب والابتسامة على وجوه الزبائن المحتجزين في بيوتهم بعد تفشي فيروس الكورونا.
وعلى الرغم من إن المحل بيوفر توصيل للمنازل بالوسائل العادية زي عربيات النقل أو الموتوسكل، إلا إن الزبائن بقوا بيطلوبوا اللامبورجيني بشكل خاص، والطلب على المانجو اتضاعف من كل الجنسيات في دبي بعد ما بدأ المحل في خدمة التوصيل الفاخرة دي.
وبالنسبة لمدة انتظار الطلب، فهي بتكون حوالي أسبوع، والزبائن اللي بيشتروا بقيمة بتزيد عن 100 درهم إماراتي بيحصلوا على جولة بالعربية مجانية ليهم ولأولادهم.
فكرة التوصيل دي جت لصاحب المحل لما بدأت طيارات نقل الركاب تنقل البضائع بعد انتشار فيروس الكورونا حول العالم، واللامبورجيني المستخدمة في توصيل الطلبات بتعتبر واحدة من أفخم وأغلى العربيات في العالم، وبيوصل سعرها لأكتر من 200 ألف دولار.