في عيد ميلادها الواحد والخمسين، شيرين رضا بين زمان ودلوقتي!

0

النهاردة بتحتفل بعيد ميلادها واحدة من أجمل الممثلات وأكترهم موهبة على الساحة المصرية؛ شيرين رضا. الفنانة، اللي مسيرتها الفنية امتدت لـ 30 سنة من العطاء للجمهور سواء في إعلانات أو أفلام أو ممسلسلات، بتكمل اليوم واحد وخمسين سنة، فحبينا في اليوم المميز ده كعرفان منّا بالجميل، نحتفل بأعمالها وباللي قدمته عالشاشة على مر السنين.

عن عين.

شيرين رضا من مواليد سنة 68، وبدأت حياتها الفنية كممثلة في الإعلانات، وفي التمانينات كانت بتعتبر أهم ممثلة في عالم الإعلانات المصرية؛ كانت ومازالت بتتميز بإطلالتها اللي بتتسم بالرقة والجمال، وممكن ده يكون السبب ورا انتشار إعلاناتها في الأوساط المصرية.

استمرت شيرين رضا في عالم الإعلانات لحد ما علي نجمها وجاتلها فرصة تقدم فوازير رمضان مع الفنان مدحت صالح في سنة 89، وفي 96 إتجهت للسينما وظهرت في فيلم “النزوة” مع الفنان أحمد زكي والفنانة يسرا، ومن هنا بدأت رحلتها مع الشاشة الكبيرة. لكن للأسف، الوضع ماستمرش، وده لإن الفنانة اختارت تنقطع عن العمل العامل في أواخر التسعينات، وغابت عن العدسة لمدة وصلت لـ 10 سنين.

في 2007، إتفاجئ الكل برجوع شيرين للسينما في 2007 بعد مشاركتها في فيلم “أشرف الحرامي” مع تامر عبد المنعم ومن إخراج فخر الدين نجيدة، وفي 2013 كان ليها دور مهم جدًا في مسلسل “بدون ذكر أسماء” اللي فيه طلعت بشخصية نجوى، رئيس تحرير مجلة فنية مشهورة وشخصية بتحاول توصل دايمًا للهي عايزاه من غير مراعاة لمشاعر الغير.

واستمر وجود شيرين الرضا على الشاشة في كل موسم، من ظهورها في فيلم “الفيل الأزرق” في 2014، لفيلم “خارج الخدمة” مع الفنان أحمد الفيشاوي. وفي 2014 تألقت في مسلسل “العهد”، بس يمكن لمعت موهبتها في عين الكل لما شاركت في مسلسل “فوق مستوى الشبهات” وفي أفلام “كدبة كل يوم” و”هيبتا”.

في 2017، ظهرت شيرين رضا في كل من مسلسل “لا تطفئ الشمس” و”حجر جهنم” اللي فيهم قامت بأدوار خلابة”.

شيرين رضا من الناس القليلة اللي كل ما بيكبروا في السن بيزدادوا جمال؛ مش بس كدا الفنانة الجميلة هيّ أيقونة للموضة في مصر، ومفيش حد مش بيشيد بالـ “ستايل” بتاعها وبقدرتها على الظهور دايمًا بشكل خلاب.

أخر كلمة: كل سنة وإنتي طيبة!

تعليقات
Loading...