حاجة تشرف ومش بنشوفها كتير، الفيلم المصري “ريش” أخد الجايزة الكبرى في مهرجان أسبوع النقاد في مهرجان كان، وده بعد عرضه يوم الثلاثاء في مهرجان كان السينمائي في دورته الـ74، في عرضه العالمي الأول ضمن مسابقة أسبوع النقاد الدولي في المهرجان، وكان بحضور المنتج محمد حفظي وعدد كبير من عشاق السينما.
ريش هو أول الأفلام الروائية للمخرج عمر الزهيري، واشترك في تأليفه مع السيناريست أحمد عامر، ومن إنتاج الفرنسيين جولييت، وبوتر وبيير من شركة Still Moving، وبالمشاركة مع Lagoonie Film للمنتجة شاهيناز العقاد، وفيلم كلينك والمنتج محمد حفظي اللي دايمًا معودنا على أعمال فعلًا مميزة. وكوجي نيليسن kepler Film ، وتولت توزيعه في العالم العربي شركة Film clinic indie Distruibution.
المسابقة الرسمية للمهرجان اتنافس فيها 24 فيلم، وكان من بينهم فيلم الافتتاح Annette والفيلم الجزائري “عَليّ صورتك”، ده غير 22 فيلم بينافسوا على السعفة الذهبية للمهرجان، وتعتبر واحدة من أرفع جوايز السينما العالمية.
الفيلم بيدخل في إطار السينما الواقعية، هتلاقي كاميرا المخرج قادرة إنها تظهر كل تفاصيل الحياة اللي بيعيشها أبطال الفيلم، فقرر المخرج إنه يدخل عالم الواقعية بس من خلال الفانتازيا والخيال، والمتمثل في قصة غير تقليدية عن عيلة فقيرة، قررت تقيم حفل عيد ميلاد حد من أولادهم، وجابوا ساحر في اليوم ده، وفي واحدة من الألعاب دي، بيدخل الأب في صندوق خشبي وبيتحول لفرخة!
قصة غير تقليدية والرسالة اللي بيوصلها الفيلم برضه غير تقليدية، نتمنى نشوف أفلام مصرية أكتر تنافس في السينما العالمية، وتقدم محتوى هادف.