عادات يومية ممكن نبقى بنعملها في روتين العناية بالبشرة أو واحنا بنحط ميكاب، في منها مش عارفين إنها عادات غلط وبتدمر البشرة، حاجات بسيطة جدًا لكن تأثيرها السلبي أكبر مما نتخيل، وسط ما بنبقى فاكرين إننا مهتمين ببشرتنا ومحافظين على روتين تجميلي، ممكن نبقى بنعمل كوارث في النص مش واخدين بالنا منها، تعالوا نعرف إيه العادات دي علشان نتجنبها.
غسل الوجه بمياه ساخنة
يمكن حاجة الناس تكون عارفاها كجملة كليشيه، لكن مانعرفش مدى ضررها، وبنقول طالما المياه مش سخنة أوي يعني ومستحملينها على جلدنا فخلاص عادي، لكن المياه السخنة مضرة جدًا للبشرة، وبتتلف الطبقة السطحية للجلد اللي دورها تحمي البشرة، وبالتالي بتتعرض للالتهابات.
غسل الوجه بصابون
أكتر حاجة الناس بتعملها ومؤخرًا بقى في توعية لمدى ضرر الصابون للوش، الناس مش بتهتم بإنها تغسل وشها بغسول مخصص وبيستسهلوا الصابون العادي اللي بنغسل بيه إيدينا وده ضرر، لاحتوائه على مواد قاسية بتسبب جفاف للبشرة، لكن استعمال غسول مخصص للوش بتركيبة ناعمة هيغذي الجلد ويرطبه.
مستحضرات التجميل الغنية بالكحول
الكحول بيسبب جفاف للبشرة بشكل سريع جدًا وملحوظ، ويمكن خدنا بالنا أكتر دلوقتي في ظل جائحة كورونا واضطرارنا لتعقيم وتطهير إيدينا دايمًا بالكحول ونلاحظ بعدها إننا بنواجه جفاف للبشرة، علشان كده لازم ناخد بالنا و نقلل استخدام المستحضرات الغنية بالكحول زيّ اللوشن، ومانستخدمهوش يوميًا. أو نهتم بترطيب البشرة بعد استخدام مستحضرات التجميل دي.
عدم تنضيف فرشات المكياج باستمرار
لازم نحافظ باستمرار على تنضيف فرش المكياج لإنها بيئة صالحة للبكتيريا، اللي بتسبب انسداد المسام، وبتضر البشرة وتتسبب في ظهور الحبوب، كمان بينصح بعدم وضع الفرش معرضة للهواء ويستحسن إنها تتحط في مكان مقفول.
التعرض للشمس من غير Sun Block
يمكن الناس كلها عارفة ده لكن برضه مش بيعملوا بيه، لكنها عادة خطر جدًا، لإن أشعة الشمس عدو للبشرة لإنها بتتلف الأنسجة، وبتسبب الشيخوخة المبكرة، كمان بنزود من خطر الإصابة بسرطان الجلد، علشان كده لازم نحرص على استعمال مستحضرات الحماية قبل التعرض للشمس مباشرة خصوصًا لو لوقت طويل.
الافراط في تقشير البشرة
مؤخرًا معظم الناس ابتدت تهتم بتقشير البشرة ضمن روتين العناية، وفعلًا دي خطوة بتفرق جدًا في صحة ونضارة البشرة، لكن للأسف كترها بيسبب ضرر كبير جدًا، وبتتسبب في ظهور الحبوب والبثور، كمان تقشير البشرة بشكل مستمر بيجردها من العناصر اللي بتحميها وده بيسبب التهابات.