النهارده عيد ميلاد الفنان بيومي فؤاد، ولإنه فنان استثنائي على المستوى المهني و على صعيد الجدل والحوارات الكتير اللي بتطلع عليه بسبب أدواره، حبينا مانعديش اليوم كده من غير ما نفتكر ليه أدوار عملها خرجته من منطقة الضحك ورمي الإيفيه لمنطقة تانية جديدة زودت شعبيته وبينت قدراته التمثيلية بشكل أوضح.
منطقة الدراما من أخطر المناطق اللي ممكن يلعب عليها أي ممثل كوميدي، وخصوصًا لو بقاله وقت مش بيظهر للجمهور غير في لون الضحك، بس دايمًا الممثل الكوميدي اللي يعرف يعمل الاتنين ويقنع الجمهور بأدائه، بنقول عليه إنه ممثل من الدرجة الأولى. وده اللي نجح فيه بيومي فؤاد في أكتر من عمل قدمه خلال مشواره.
عندك مثلًا دوره في مسلسل ولاد ناس اللي اتعمل في رمضان 2021، كان دور أكتر من رائع أدى فيه دور الأب كما يجب أن يكون، كان ليه مشاهد مع بنته استحالة تحس إنهم بيمثلوا، الكلام كان بيطلع بمنتهى التلقائية علشان كده صدقناه. ولما عمل دور الراجل اللي بيحب من طرف واحد مع يسرا في مسلسل خيانة عهد، كان ليه مشاهد يتقال عليها ” ماستر سين”.
ودوره في مسلسل الاختيار2، وقت لما جسد فيه دور والد الشهيد عمر القاضي، كان مشهد واحد حسسك فيه إنه بقاله 100 سنة بيمثل، كان في نضج ورزانة في الأداء كانت تستحق نقف عندها.
أما عن دوره في مسلسل موجه حارة، لما أدى فيه دور الشيخ المتناقض واللي بيعمل عكس اللي بيدعي الناس ليه، وبيقول إنه صاحب فضيلة وهو غير كل ده، قدر بيومي من خلال الدور ده إنه يخلي الناس تكرهه بمنتهى السهولة.
بيومي فؤاد برغم الجدل اللي بيحصل عليه بسبب إنه بيقدم أدوار كتيرة في فترة زمنية قليلة، وإنه بيظهر على الشاشة سواء في برامج أو إعلانات مايمنعش إنه بيمتلك موهبة استثنائية عالية في الكوميديا ومتفرد في تقديمها للجمهور، ومؤخرًا قدر يبهرنا كمان في أدوار التراجيدية.