شوفنا إعلانات كتير في رمضان السنة دي، بس في إعلان ظهر في أخر أيام رمضان وعمل ضجة على السوشيال ميديا، واعتبروه أحسن إعلان من حيث الفكرة والتنفيذ والوصول للجمهور المستهدف وعملت مشاهدات تعدت الـتسعة مليون مشاهدة خلال خمس أيام.
تعالوا نعرف إيه الأسباب اللي خلته يعلق مع الشباب في وسط كمية الإعلانات الكتيرة السنة دي و ليه معتبرينه أحسن إعلان من وجهة نظر Marketing conception
- أول حاجة إنه يعتبر أفضل إعلان اتعمل في حملة أنت أقوى من المخدرات من ساعة ما نزلت من كذا سنة واللي أول لما نزلت كان محمد صلاح هو بطلها.
- المرة دي ماعتمدوش على أي حد مشهور علشان يطلع يقول “أنت أقوى من المخدرات” مع أغنية وشكرًا على كده من باب الاستسهال، لأ دول جابوا شباب عادية (ولد وبنت) من نفس الجمهور المستهدف بتاع الحملة علشان يوصل الرسالة بشكل أحسن والمختلف كمان إنهم عملوا إعلان للبنت وإعلان للولد، لإن معظم الإعلانات كانت بتركز على الشباب بس، مع إن في نسبة كبيرة برضه من البنات بيقعوا تحت تأثير المخدرات.
- فكرة ربط الملاهي (قطر الموت) بالإدمان فكرة عبقرية، لإن الاتنين بيفرزوا مادة الأدرينالين.
- محتوى الإعلان بسيط ومختلف، ماستخدمش صيغة الأمر أو إن اللي بتعمله ده كارثة، لأ هو دخل من حتة إن أه أنت فعلًا هتنبسط في أول الرحلة بس بعد كده هتتسحل وراها “رحلة المخدرات ممكن تبسطك في أولها بس أكيد هتضيعك في أخرها.. المخدرات رحلتها قصيرة ماتسافرهاش”
- مشاهد الإعلان: مشهد واحد لمدة ثواني معدودة، بيوضع مدى الحيوية والطاقة اللي الشخص بيبقى فيها (من باب حلاوة البدايات) وبعدين ينقلك في لحظة تخضك للمعاناة الجسدية والنفسية اللي بيتعرضلها بعد لحظات من السعادة الوهمية.
إعلان لمدة ثواني معدودة وعبارة عن مشهد واحد، وصل الرسالة بشكل أفضل مما يكون، أفضل من محاضرة طويلة أو ناس مشاهير يتكلموا عن خطورة الإدمان، ومن وجهة نظر التسويق يعتبر حقق كل العناصر اللازمة لنجاح الحملة، فكرة اتنفذت بطريقة السهل الممتنع وماكانش كليشيه، شابو لصاحب الفكرة واللي نفذها.