الفترة الأخيرة، وبالتحديد بعد نزول برومو مسلسل “الملك” اللي كان المفروض ينزل في شهر رمضان، بدأنا نشوف سيول من الميمز، اللي وصل بعضها لانتقادات حقيقية، حول طبيعة المسلسل، من أول نزول بوستر المسلسل اللي كان المفروض يكون عن الملك أحمس لكن الصورة المستخدمة كانت لتحتمس الثالث، لحد اللبس والديكورات والاكسسوارات وكمان المكياج المستخدم في العمل.
وده اللي سبب انتقادات كتير من الناس اللي شافوا إن ده مش هيدي مصداقية للمسلسل وهينقل صورة غلط عن الحقبة الزمنية اللي المفروض بيتكلم عنها.
ومن الناحية التانية كان في بعض الناس اللي دافعوا عن العمل وقالوا إنه عمل درامي وإن ده “فن” فمن الطبيعي وجود اختلافات في التفاصيل. ولكن من الواضح إن عدد المعارضين كانوا أكبر.. واستمرار نشر رواد السوشيال ميديا لميمز بتتكلم عن عدم اهتمام صناع العمل بالتفاصيل التاريخية المهمة، خلى شركة الإنتاج “المتحدة للخدمات الإعلامية” تعلن وقف تصوير المسلسل وتشكيل لجنة عاجلة من مجموعة من المتخصصين في التاريخ والآثار وعلوم الاجتماع علشان يتفرجوا على المسلسل ويراجعوا السيناريو بالكامل ويقولوا رأيهم المهني في العمل.. حتى لو ده معناه تأجيل عرض المسلسل وانسحابه من السباق الرمضاني اللي جاي.
وزيّ ما في ناس حست إن ده القرار الصح اللي كان لازم ياخده أصحاب العمل، إلا إن أكيد في كمان كتير من الجمهور كان متشوق إنه يتفرج على المسلسل في رمضان وزعل من احتمالية تأجيله، والأكيد كمان إن بعض أصحاب المسلسل أصابوا الإحباط إن العمل اتوقف دلوقتي، خصوصًا إن أكيد في مجهود كبير اتبذل في التحضيرات والتصوير.. فعلق المخرج عمرو سلامة على الموضوع وعبر عن استيائه من توقف المسلسل لإنه شايف إن ده تضييع مجهود لكل القائمين على المسلسل وإن في “رخصة إبداعية” لأي عمل تديلهم المساحة إنهم يعملوا اللي هما عايزينه من ناحية التنفيذ، زيّ ما من حق المشاهد إنه يقرر عايز يتفرج على المسلسل زيّ ما هو ولا لأ..
وعلق كمان ياسين أحمد السقا، اللي يعتبر مسلسل الملك هو أول تجربة فنية ليه، على الموضوع وقال “أنا واثق في إن ربنا عمره ما هيضيع مجهودنا أبدًا، وأنا فخور إني جزء من هذا العمل المشرف، وفخور إن أنا بشتغل مع أستاذ عمرو يوسف وأستاذ حسين المنباوي وجميع الفنانين المشتركين وربنا كبير”.